Gov. Garcia makatutok na sa kaugalingon

CEBU, Philippines — Pipila ka adlaw sa dili pa ang iyang hingpit nga pagkanaog sa katungdanan, si outgoing Governor Gwendolyn Garcia nagkanayon nga naghinam-hinam na siya nga matapos na ang iyang termino isip gobernador sa Probinsya sa Sugbo.

Atol sa iyang mensahe sa R’Cebu Expo sa usa ka mall sa dakbayan sa Sugbo, si Garcia nagkanayon nga human sa sobra 20 ka tuig, makapahulay na siya sa panerbisyo.

“I am just so excited nga mahuman ang akong pag-alagad sa Sugbo karong Hunyo 30,” matud ni Garcia.

“Kay sa labing unang higayon sukad 2004, makasugod na ko’g huna-huna alang sa akong kaugalingon,” dugang sa outgoing governor kagahapon sa event- usa ka kalihokan kon diin ang mga kalungsoran gikan sa tersero ug kinto distrito mi-showcase sa mga lokal nga produkto sa mga lungsod.

Sumala ni Garcia nga sukad sukad wala niya giangkon ang Sugbo tungod kay matud niya ang Sugbo iya sa mga Sugboanon.

Si Garcia gikatakdang monaog sa karong Hunyo 30, ug pulihan ni Governor-elect Pamela Baricuatro nga maoy mipildi kaniya niadtong Mayo 12 nga piniliay.

Si Baricuatro nakakuha og 1.1 million votes samtang si Garcia nakakuha og sobra 700, 000 votes.

Si Garcia maoy labing unang babaeng gobernador sa Probinsya sa Sugbo. Siya unang misilbi sa iyang unang termino pagka gobernador niadtong 2004 hangtod 2013.

Nagpapili siya balik alang sa iyang ika-upat nga termino niadtogn 2019 ug nakadaog ug nakapadayon sa iyang ikalimang termino human nakadaog niadtong 2022 nga eleksyon. IBM BANAT NEWS