Shuttle para sa BPO employees gisugyot ni Osmeña

CEBU, Philippines — Plano ni Cebu City vice mayor-elect Tomas Osmeña nga molusad og shuttle service aron suportahan ang mga empleyado nga anaa sa industriya sa Business Process Outsourcing (BPO) sa Dakbayan sa Sugbo.

Gisugyot ni Osmeña atol sa konsultasyon tali sa usa ka BPO firms niadtong Hunyo 19, 2025 nga kinahanglan nga molusad og shuttle service ang syudad nga magdala sa mga empleyado gikan sa ilang mga panimalay paingon sa ilang buhatan ilabi na sa mga empleyado nga night shift ang eskedyul sa trabaho.

Tinguha sa maong sugyot mao ang pagtubag sa dugay na nga mga isyu sa transportasyon nga giatubang sa mga empleyado sa call center ilabi na gasto sab kaayo ang mga serbisyo sa motorsiklo nga nakabase sa app ilabi na og gabii.

Si Osmeña miingon sa mga stakeholders sa BPO nga ang mga empleyado mismo ang magmapa sa ilang mga lokasyon sa balay paingon sa ilang buhatan lakip na ang oras sa trabaho nga magtugot sa siyudad sa paghimo og episyente nga mga rota kung asa sila nga bus stop maghuwat base sa ilang panginahanglan.

“Subscription-based fare” ang sistema sa maong transportasyon kun diin dili na kinahanglan nga diha-diha dayon nga mobayad ang mga pasahero ngadto sa drayber o direkta mobayad gamit og tiket.

 Kinahanglan lang niini nga mohikay og pre-arranged subscription una nga mopahimulos sa serbisyo.

Aron nga mapatuman kini, mohangyo si Osmeña sa pipila ka mga negosyante nga anaa sa pribadong sektor nga punduhan ang pasiunang upat ka gamiton nga bus.

“This will probably be the only system in the world designed by the customer, by the rider themselves, down to where the bus stop will be. It will run smoothly, conveniently, and fast,” suma pa ni Osmeña. IBM BANAT NEWS