Tulo ka NPA napatay sa engkwentro

CEBU, Philippines — Tulo ka miyembro sa New People's Army (NPA), lakip ang usa ka top-ranking leader ug duha ka sakop niini nga gisuspetsahan sa pagpatay sa usa ka sibilyan, ang napatay sa engkwentro tali sa ilang grupo ug mga sakop sa 93rd  Infantry Battalion sa Philippine Army sa Brgy. Cogon, Carigara, Leyte kaniadtong Hunyo 18, 2025. Nahitabo kini atol sa combat operation sa bukirang bahin sa maong barangay batok sa mga nahabiling miyembro sa Squad 2, Island Committee (IC) LEVOX ubos sa Eastern Visayas Regional Party Committee (EVRPC).

Si Lieutenant Colonel Charlie Saclot, commanding officer sa 93rd  IB niila sa mga napatay nga mga rebelde nga sila si Juanito P. Sellesa Jr., nailhan usab nga alyas Tibor, usa ka executive committee member sa IC LEVOX; Eugene Paclita alyas Dimple, ang Squad Leader sa Squad 2; ug Lito D. Laurente alyas Dodong, sakop sa maong NPA unit. Narekober sa ilang temporaryong hideout ang usa ka M16 rifle nga adunay duha ka tag-as nga magazine, usa ka kalibre .45 nga pistola nga adunay duha ka magazine, usa ka hand grenade, personal nga mga butang, ug mga subersibong dokumento.

Matud sa mga otoridad nga dugay nang wanted si alyas Tibor ug ang iyang grupo tungod sa pagpatay kang Jesus “Sosing” Sarcilla sa Barangay Binibihan, Carigara, Leyte niadtong Disyembre 7, 2021.

Si Sarcilla gipusil atubangan sa iyang anak nga si Zosima Sarcilla, bisan pa nga gitabangan niini kaniadto ang grupo pinaagi sa paghatag kanila og pagkaon ug kapuy-an.

Gawas sa mga kasong pagpatay nga gisang-at atubangan sa Regional Trial Court, usa ka buwag nga kaso sa paglapas sa International Humanitarian Law ang gipasaka batok sa grupo ni Tibor sa Branch 48 sa Regional Prosecution Office 8, sumala sa Commission on Human Rights Regional Office 8.  Si Brigadier General Noel A. Vestuir, commander sa 802nd Infantry Brigade, midayeg sa 93rd IB sa malampusong operasyon ug nisubli usab sa iyang pahimangno sa mga nahabiling miyembro sa NPA nga mosurender ug biyaan ang armadong pakigbisog.  IBM BANAT NEWS