Archival di motuong paigo ang P12.1 bilyon

CEBU, Philippines — Dili kumbinsido si Cebu City mayor-elect Nestor Archival sa pamahayag ni Mayor Raymond Alvin Garcia nga kapaigo ang pundo sa sunod tulo ka tuig alang sa pagpanweldo sa mga empleyado sa City Hall.

Sayo pa niining semanahuna, gibutyag ni Garcia nga adunay P12.1 bilyones nga cash asset ang siyudad nga andam nga itunol sa sunod nga administrasyon.

Subay sa kapasidad sa pundo nga anaa sa Dakbayan sa Sugbo, nakita ni Garcia nga makasugakod pa gyud kini og pasweldo sa mga empleyado sa sulod sa sunod tulo ka tuig ug makasustinir pa sa mga operasyon sa City Hall.

“We have enough money bisan pa’g for the next three years mao gihapon ang atong number of employees, casual ug job order.

Kaya kaayo sa siyudad sa Sugbo, kaya kaayo. Sa ato pa, kadtong giingon nga three months, chicken ra kaayo to, dali ra to nato nga bayran, kay dako kaayo og pundo ang Cebu City Government,” pulong pa ni  Garcia atol sa iyang teleconference.

Una na nga gipadayag ni Archival nga lugwayan niya sa tulo sa buwan ang kontrata sa mga kasamtangang casual nga mga empleyado sa syudad bisan pa man og mag-usab na ang administrasyon.

 “I respect the mayor’s statement. But from the early reports I’ve seen, I’m not sure if that’s enough,” suma pa ni Archival.

Gibutyag ni Archival nga mogasto ang kagamhanan matag semana ngadto sa P40 milyones alang sa mga job-order nga mga empleyado.

“I’m worried that amount may not be sustainable,” padayag pa ni Archival.

Gihimug-atan ni Archival nga wala pa niya makita ang gikumpirmar nga mga record ug kinahanglan pa nga sutaon ug tun-an pag-ayo sa iyang transition team ang P12.1 bilyon nga nahibiling cash asset sa syudad.  IBM BANAT NEWS