Comelec nipasabot sa pag-delete sa materiyales sa eleksiyon
CEBU, Philippines — Kusganong gihimakak sa Commission on Elections (Comelec) ang mga pasangil nga nikatap diha sa social media nga gi-delete nila ang tanang files sa May 12, 2025 national ug local elections.
Gikataho nga usa ka kanhi kawani sa gobiyerno ang ni-post sa iyang Facebook page ug nipasangil nga gi-delete sa Comelec ang tanang datos sa nilabay’ng eleksiyon aron mapugngan ang pag-retrieve sa mga file ug pagpapas sa mga ebidensiya. Giklaro sa Comelec nga ang public deletion nga gipahigayon niadtong Mayo 30, 2025 limitado lang sa mga datos sa National Printing Office (NPO) sa Quezon City nga naglakip sa mga soft copy sa Official Balot Faces, Accountable Forms ug Voter Information Sheets (VIS) nga gitipigan sa maong data servers.
Ang Comelec nagkanayon nga ang pag-delete sa maong mga materiyales human sa May 12 election usa ka standard nga "post-election procedure" aron mapanalipdan ang seguridad sa eleksiyon, malikayan ang dili awtorisadong paggamit sa mga nahibilin nga file nga naglakip sa personal nga impormasyon sa mga botante ug masiguro ang pagtuman sa Akta Republika 10173 kun “Data Privacy Act of 2012”.
Matud sa Comelec nga maong pamaagi wala makaapekto sa mga main archive o opisyal nga mga rekord sa 2025 election diin nagpabili kining secured.
Ang maong aksiyon hingpit nga nagsunod sa direktiba sa Comelec en banc nga gipagawas kaniadtong Mayo 27, 2025 nga nagtugot sa pag-delete pinaagi sa Committee on Ballot Printing nga gipangulohan ni Commissioner Rey Bulay.
Ang maong proseso gipahigayon atubangan sa mga representante sa Commission on Audit (COA), accredited citizens’ arms, mga political party, media ug gi-broadcast kini live sa opisyal nga Facebook ug YouTube channels sa Comelec alang sa sigurado nga ang kalihokan transparent ug accountable.
Nunot niini, giawhag sa Comelec ang publiko ilabina ang mga politiko ug kandidato nga mahimong tigpasiugda sa katungod sa matag Pilipino sa hustong impormasyon ug dili mahimong instrumento sa pagpakatap og misinformation/disinformation sa nasud. BDB BANAT NEWS
- Latest
