Mga tindahan og panapton naugdaw sa sunog

CEBU, Philippines — Naugdaw sa nahitabong sunog ang mga tindahan sa panapton diha sa Purok Santol, Barangay Poblacion, Lungsod sa Compostela kagahapon sa kadlawon.

Si Fire Officer 2 Ledo Rey Comendador, fire investigator sa Compostela Fire Station nagkanayon nga ang alarma sa sunog ilang nadawat alas 4:17 ang takna kagahapon sa kadlawon.

Matud ni Comendador nga daling nikatap ang kayo ug nakontrolar kini alas 4:20 sa kadlawon ug hingpit nga napawong alas 4:50 sa kaadlawon

Si Comendador nagkanayon nga nilungtad pa ang pipila ka mga gutlo nga napadangat ang pagpahibalo ngadto kanila sa maong sunog nga nahitabo diin nag-una pa niini ang pag-post diha sa social media. Matud usab ni Comendador nga ang dapit nga nasunog anaa lang mahimutang mga 50 metros ang gilayon gikan sa ilang fire station ug ang nagpahibalo ngadto sa ilang buhatan ang usa ka tawo nga nagpuyo duol sa maong lugar.

 Ang mga gibaligya nga nahimutang sa lima ka stalls nga nasunog mao ang ready-to-wear nga mga panapton, mga tsinelas, sandals, sapatos ug uban pa.

Ang mga napektohan nga mga nag-abang nga mga naninda sa maong mga stall nga nasunog kadaghanan kanila mga Muslim.

Ang pag-ulbo sa sunog nahitabo dihang sirado pa ang maong mga tindahan niadtong higayona.

Dugang ni Comendador nga dili pa nila matino ang danyos sa maong sunog diin napahigayon pa sila og dugang imbestigasyon niini. BDB BANAT NEWS