Garcia miklaro, Carbon Market naapil na isip heritage site

CEBU, Philippines — Giklaro ni Cebu City Mayor Raymond Alvin Garcia nga wala na kinahanglana ang laing ordinansa aron maprotektahan ang Carbon Market, tungod kay kini sakop na sa existing nga ordinansa nga nagmugna sa heritage district sa dakbayan.

Sa usa ka teleconference niadtong Hunyo 17, 2025, gipasabot ni Garcia nga ang karaang downtown area sa siyudad, lakip ang Carbon, gideklarar na isip protected area ubos sa maong ordinansa nga naglatid sa mga utlanan sa heritage zone.

“Actually, uwahi naman na. I don’t think they’re aware that we already have an ordinance, creating the heritage district of the City of Cebu,” matud ni Garcia.

Dugang sa mayor kung maghimo pa og laing balaodnon nga pareho sa naumol na nga ordinansa, mahimong doble ang implementasyon ug dili na kini kinahanglan.

Bisan pa niini nalipay ang mayor nga adunay grupo ug sektor nga nagpakabana sa pagpanalipod sa kabilin sa mga Sugbuanon nga maoy nagpaila sa pagkatawo sa mga taga-Cebu.

Sumala sa Cebu City Public Information Office, ang Ordinansa Blg. 2720 nga napasar niadtong 2023 mao ang naglatid sa downtown area isip heritage district ug nagtugot sa pagtukod sa Cebu City Heritage Council.

Sa laing bahin, giingon ni incoming Cebu City Mayor Nestor Archival Sr. nga iyang susihon ang ordinansa una pa siya maghimo og desisyon.

Midugang siya nga dili niya pasagdan ang mga hangyo ug reklamo sa mga vendors, lakip na ang posibilidad sa paghimo og standalone ordinance para sa Carbon Market. — Shiela Mae H. Agrabio (BANAT NEWS)