DOT mihingusog sa kampanya batok tourist scam

CEBU, Philippines — Gilusad sa buhatan sa Department of Tourism (DOT) 7 ubos sa koordinasyon sa kagamhanan sa Siyudad sa Lapu-Lapu ang pagpakgang sa tourist scam nga gikatahong naghitak sa maong dakbayan.

Si DOT- 7 Director Judy Gabato nga nahinabi sa mga tigbalita atol sa iyang pagtambong sa 64th Charter Day sa Siyudad sa Lapu-Lapu miingon nga nakigtigum na sila sa kadagkoan sa nagkalain-laing ahensiya sa kagamhanan dinhi sa Sugbo.

Lakip sa mitambong sa panagtigom mao ang kadagkoan sa kapolisan ug mga opisyal sa buhatan sa turismo ug mga lokal nga kagamhanan.

Natuki sa panagtigum ang reklamo sa mga langyaw nga turista nga nahimong biktima apil na ang turistang Koreano nga gipangayoan og dakong kantidad sa pagsulod niini sa usa ka pribadong beach resort sa Barangay Maribago.

Ang maong mga tawo nagpakaaron-ingon nga motabang sa mga langaw bugti sa dakong kantidad nga ilang pangayoon. Sila nagpatuo nga mga tourist guide ug mosugyot og maanindot nga mga dapit nga ilang suroyon.

Mikatap na ang maong panghitabo ngadto sa uban nga mga langyaw nga turista nga maoy hinungdan sa nagkahinay nga dagan sa industriya sa turismo.

Nasuta nga sa first quarter sa 2025 mikunhod ang gidaghanon sa mga turista gikan sa 787,954 sa tuig 2024 itandi sa first quarter niining tuiga nga anaa lamang sa 182,789 ka mga langyaw nga turista nga mibisita sa Sugbo. (BANAT NEWS)