DepEd masaligon nga makab-ot ang ilang target enrollees
CEBU, Philippines — Nagmalamposon ang pagbukas sa klase sa mga pampublikong tunghaan sa Central Visayas, diin miabot sa 1.4milyon ka mga tinun-an ang ilang natala apan posibleng mosaka pa kini.
Si Dr. Salustiano Jimenez ang Director sa DEPED 7 miingon nga makab-ot nila ang ilang target enrollees karong tuiga nga 1.6milyon.
Sumala pa ni Jimenez, sa pagkakaron ang mga tunghaan nagpadayon pa sa enrollment ug ilang gilantaw nga dul-an sa 200mil kapin kun kulang ang madugang niini.
Dugang pa niya nga mahinungdanon kaayo nga masayran daan kong pila ang mga enrollees kay mao kini ang ilang basehan sa pagkuha sa mga gikinahanglan sa mga tunghaan lakip na ang mga magtutudlo.
Mapasalamaton si Jimenez nga malampuson ang ilang pagbukas sa klase tungod usab sa kooperasyon sa tanang stakeholders, lakip niini ang mga ginikanan, magtutudlo, tinun-an uban sa suporta sa mga Law Enforcement Agency nga naghatag og kaluwasan sa mga eskwelahan.
Giangkon ni Jimenez nga aduna gihapoy kakuwangan sa mga classrooms ug magtutudlo apan napangitaan na kini og pamaagi nga mapasayon alang sa mga tinun-an.
Lakip sa gihimo nila ang shifting sa klase ug pag adjust sa ratio sa mga classrooms. (BANAT NEWS)
- Latest
