Memorandum ni Garcia sabotahe sa umaabot nga administrasyon?

CEBU, Philippines — Si governor-elect Pamela Baricuatro nipasangil nga pagsabotahe sa umaabot niya nga administrasyon ang giluwatan ni outgoing-governor Gwendolyn Garcia nga memorandum pag-establisar og trust funds alang sa mga programa ug proyekto sa Probinsiya sa Sugbo.

Gikasagmuyo ni Baricuatro ang maong lakang ug matud niya nga usa ka last-minute attempt aron manipulahon ni Garcia ang provincial budget pipila ka adlaw sa dili pa kini hingpit mokanaog sa katungdanan.

Si Baricuatro nipasangil usab nga ang gihimo ni Garcia klaro nga pagsalikway sa prinsipiyo sa good governance ug democratic transition ingon man kalapasan sa legal ug ethical standards.

Gibutyag ni Baicuatro nga sa pagsulod sa bag-ong liderato sa Kapitolyo ilang i-assess, i-revive ug kon kinahanglan i-revoke ang bisan unsa nga ilegal o kwestiyonable nga probisyon sa maong memorandum.

Gikataho nga si Garcia niluwat og memorandum pagmando sa provincial treasurer Atty. Roy Salubre nga mohimo ug mo-establisar og trust funds.

Kini aron nga mapadayon ang nagkadaiyang programa ug proyekto nga nasugdan sa iyang administrasyon.

Apil sa maong mga programa ang Suroy-Suroy Sugbo, Sugbo Kahanas, Sugbo Merkado, Sugbo Segurado, Sugbo Patubig sa Carmen ug Moalboal, Sugbo Kuryente didto sa Malapascua, Sugbo Semento, Sugbo Sentro, Cebu Provincial Government Lot Sales, turismo sama sa canyoneering ug river adventure, settlement account alang sa investment sa mga overnight placement, Mactan-Cebu Management Board ug mga ongoing projects ubos sa 20 porsyento nga development fund.

Lain usab nga gipahimoan og trust fund mao ang development and livelihood fund ug reforestation, watershed management, health ug environmental fund, subay sa Internal Rules and Regulations sa Akta Republika 7638 kun “Department of Energy Act of 1992”.

Ang memorandum nga giluwatan ni Garcia aduna kini petsa nga Hunyo 16, duha ka semana sa dili pa kini mokanaog sa katungdanan karong Hunyo 30. (BANAT NEWS)