Bukirang barangay sa Talisay butangan og mga polis

CEBU, Philippines — Butangan og mga polis ang mga bukirang barangay sa Siyudad sa Talisay.

Kini maoy laraw ni Police Lt. Col. Maila Maramag, hepe sa kapolisan sa Dakbayan sa Talisay aron nga makuha nila ang 3-5 minutes nga pagresponde.

Giangkon ni Maramag nga malangay sila sa pagresponde tungod sa kadaghan sa molupyo ug sa paghuot sa dagan sa trapiko.

Busa ang pagbutang og polis sa bukirang barangay mao kini ang tubag sa paspas nga pagresponde.

Una niini, si PNP Chief Nicolas Torre nipagawas og palisiya sa 3-5 minutes nga pagresponde og alarma.

Matud pa ni Maramag nga ang fixed visibility point mao ang paspas nga pagtubag sa emerhensya ug uban pa nga kinahanglan sa presensya sa kapolisan.

Nihangyo si Maramag ngadto ni mayor Gerald Anthony “Samsam” Gullas ug sa mga opisyales sa barangay aron sila matabangan sa maong katuyoan.

Iyang nakita nga diha sa barangay hall sa Campo 4 mao ang angay nga butangan og polis aron maoy moresponde sa Manipis ug Jaclupan.

Nihangyo usab si Maramag ngadto sa Police Regional Office (PRO-7) ug sa Cebu Provincial Police Office nga madugangan sila og polis. (BANAT NEWS)