Langyaw nga nakonbIkto sa sexual abuse gi-intercept sa BI
CEBU, Philippines — Gi-intercept sa Bureau of Immigration (BI) ang usa ka 36-anyos nga American national kinsa gikatahong nakonbikto kaniadto sa kasong sex abuse nga naglambigit og menor de edad ngadto sa Amerika.
Ang langyaw giila nga si Matthew Stephen Gross, kinsa nitugpa diha sa Mactan-Cebu International Airport niadtong Hunyo 16, 2025 sakay sa Eva Air flight gikan sa Taipei.
Ang BI nipasabot nga ang pag-intercept ni Gross diha sa airport subay kini sa kasamtangang mga polisiya sa immigration nga nagdili sa mga indibidwal nga nakonbikto sa mga krimen kalabot sa moral turpitude sama sa sexual offenses sa pagsulod sa nasud tungod sa ilang potensiyal nga hulga sa kaluwasan ug interest sa publiko.
Si Gross gikataho nga nakonbikto niadtong 2012 tungod sa Second-Degree Sex Abuse ngadto sa Estados Unidos kinsa ang biktima usa ka 17-anyos.
Si Boss gi-exclude sa BI si Gross ug diha-diha dayon gipadala og balik sa port diin kini gikan ubos sa immigration exclusion proceedings.
Si BI Commissioner Joel Anthony Viado nagkanayon nga ang exclusion kabahin sa pagpakusog sa buhatan sa pagpanalipod sa mga huyang nga sektor ilabina sa mga bata, ubos sa flagship #ShieldKids campaign niini.
Gisubli ni Viado nga nagpabiling dili matarog ang pasalig sa BI nga magpabiling luwas ang Pilipinas pinaagi sa hugot nga pagpatuman sa mga balaod sa immigration.
Si Gross gilakip kini sa blacklist sa BI nga permamenting nag-ban kaniya sa pagsulod sa Pilipinas. (BANAT NEWS)
- Latest
