Wenceslao, Pesquera gipasanginlang nibabag sa sweldo sa mga JO

CEBU, Philippines — Gibutyag nila ni Konsehal Noel Wenceslao ug Jocelyn Pesquera nga gipasanginlan sila sa pipila ka project-based personnel o job order employees sa Dakbayan sa Sugbo human nga wala kini nasweldohi sukad pa niadtong niaging tuig.

Si Wenceslao nagkanayon nga ang nahitabo niadtong panahon sa pagpangampaniya nga adunay mga indibidwal o mga nagpa-ilang JO gikan sa bukirang bahin sa siyudad nga nipadayag nga dili na mobotar nila ni Pesquera tungod kay silang duha ang nagbabag aron nga dili sila masweldohan.

Isip chairman sa Committee on Budget and Finance gipahibalo ni Wenceslao ang konseho nga adunay mga JO sa city hall nga wala pa mabayari hangtud karon sukad pa niadtong Mayo sa niaging tuig.

Kasamtangang adunay 2,668 ka job order employees ang siyudad ug matag tuig sukad pa niadtong 2024 ang mga JO makadawat og tag P5,000 isip service premium pay sa mga bulan sa Mayo ug Nobiyembre.

Ug gumikan kay wala kini makadawat sa ilang sweldo adunay mga empleyado nga modangop sa buhatan ni Wenceslao, manawag sa iyang personal nga numero ug mangayo og kasayoran kong kanos-a nila madawat ang ilang sweldo.

Si Wenceslao nagkanayon nga gipadangat na kini niya ngadto kang Mayor Raymond Alvin Garcia sa duha ka higayon ug gikatahong ang mayor nihatag na og kamandoan sa city administrator apan hangtud karon wala pa gihapo’y nahitabo sa maong hangyo sa pagpapagawas sa sweldo sa mga JO. (BANAT NEWS)