Amerkano nag-wild kay gibuno iyang manok

CEBU, Philippines — Gidakop ang usa ka 65 anyos nga Amerikano human siya nag-wild sulod sa buwangan sa Barangay Tabunok, Dakbayan sa Talisay human matud pa napildi ang iyang gipustahang manok niadtong Lunes sa hapon.

Ang langyaw mao si alyas Earl nga nagpuyo sa Syudad sa Naga, gireklamo siya sa mga trabahante sa buwangan tungod sa iyang pagpanghasi.

Si Police Lt. Col. Maila Maramag, hepe sa kapolisan sa Talisay nibutyag nga nakatulog gyud sa prisohan ang mao nga langyaw human siya gi-citizen arrest.

Matud pa ni Maramag nga nanari ang langyaw ug nakakita kini og tapad sa iyang manok. Apan sa dihang nagsultada na gimalas kini kay gibuno ang iyang manok.

Napilde kini og P30,000. Gumikan niini nag-wild ang langyaw ug iyang giguba ang pultahan sa ruydahan ug uban pa nga gamit sa buwangan.

Iya sab nga gituok ang “kuymi” o sentensyador sa manok hinungdan nga mitawag sila pakitabang sa kapolisan.

Pasakaan unta og kaso nga malicious mischief ang langyaw apan nagkasinabot ra sila sa tagdumala sa buwangan ug wala nay kaso nga ipasaka. IBM BANAT NEWS