Tig-repack og shabu mga menor, apan mabdos ang naabtan sa NBI

CEBU, Philippines — Naalarma ang National Bureau of Investigation Cebu District Office (NBI-CEBDO)  sa report nga mga menor de edad ang tig-repack og shabu sa usa ka drug pusher sa Sitio Manga, Barangay Tisa, sa Cebu City .

Apan sa gihimo nilang buybust operation batok kaniya wala silay naaktohang menor de edad nga nag-repack og shabu, kondili 16-anyos nga mabdos og tulo ka buwan.

Si NBI-CEBDO Agent-in-Charge Arnel Pura miingon kagahapon, Hunyo 17, nga nadakpan hinuon nila ang 37-anyos nga subject sa operasyon nga si Alvin Plando niadtong Lunes sa  hapon , Hunyo 16. Ang operasyon gihimo sa NBI tungod sa impormasyon nga batang babaye ang tig-repack og ilegal nga drugas ni Plando.

“This is quite alarming and that’s why we have that urgent instruction to conduct appropriate action and the rescue these alleged minors,” matud ni Pura. Nakuha sa NBI-CEBDO ang 18 ka medium-sized nga pakete sa shabu nga gi-banabana nga nagkantidad og P270,000 sa street value. Apil usab sa nasakmit ang mga paraphernalia sa drugas.

Ang operasyon nga ilang gihimo kauban ang Philippine Drug Enforcement Agency (PDEA). Didto naabtan nila ang 16-anyos nga mabdos nga giingong kapuyo sa ig-agaw ni Plando.

Ang menor de edad ilahang ipasa ngadto sa Department of Social Welfare and Development (DSWD). Sa pag-drug test sa duha,  positibo sa paggamit og drugas ang mabdos samtang si Plano negatibo.  Wala maestablisar sa NBI-CEBDO kung unsay kalambigitan niadtong menor de edad nga mabdos sa ilegal nga kalihokan ni Plando.

Sumala pa ni Atty. Niño Rodriguez, ang agent-on-case, base sa ilang initial nga imbestigasyon, mga babayeng menor de edad ang tig-repack ni Plando kay pulido sila og trabaho.

Wala pay kaso o criminal record si Plando nga susama niini, matod pa ni Rodriguez.

Apan sa interbyu kang Plando giangkon niyang namaligya siya og drugas “para sa experience” apan gihimakak niyang nag -hire siya’g mga babayeng menor de edad nga tig –repack ug tsismis lang kini.

“Dili na tinuod uy, mga barkada na nako. Sa wala pa ko naninda ana, anha gyud na sila sa akong balay mag-standby,” matud ni Plando.

Si Plando nahibulong nganong nag positibo sa drugas ang mabdos nga uyab sa iyang ig-agaw. IBM BANAT NEWS