Baricuatro nakaduso na og tubag sa Comelec

CEBU, Philippines — Hingpit na nga nakaduso og tubag ang kampo ni Governor-elect Pamela Baricuatro sa electoral protest nga gisang-at ni outgoing Governor Gwendolyn Garcia.

Ang legal team ni Baricuatro nakaduso sa verified answer niini ngadto sa Commission on Elections (COMELEC) diin sa maong tubag gihulagway nga ang protesta ni Garcia kulang sa merito ug nanghinaot ang kampo ni Baricuatro nga kini madismiss o mabasura dayon.

Si Baricuatro, girepresentahan sa legal counsel niini nga si Atty. Alberto C. Agra, uban sa Batuhan Blando Law Offices nga nagsilbing collaborating counsel, gipangulohan ni Atty. Alberto C. Garcia.

Ang kampo ni Baricuatro nagkanayon nga angayan ra nga ibasura ang protesta ni Garcia tungod kay insufficient "in form and substance" tungod kay pakyas sa pagpamatood nga adunay pagpanlimbong o anomaliya sa gipang contest nga mga presinto.

Si Garcia mikwestyon sa resulta sa boto sa kapin 4,100 ka clustered precincts sa Probinsya. Si Baricuatro nakakuha og 1.1 million ka boto samtang si Garcia nakakuha lang og sobra 700,000 ka boto. Si Atty Agra nagkanayon sab nga giusab ni Baricuatro ang political narrative sa Probinsya sa Sugbo. Usa ka civic leader nga walay name recall, walay political pedigree o machinery ug walay access sa government resources.

Matod ni Agra nga ang kadaogan ni Baricuatro dili lang electoral kon dili "transformational".

Samtang magpadayon ang legal nga proseso, ang kampo ni Baricuatro motutok sa mga programa niini sama sa kalidad nga hospital ug healthcare accessibility; paghatag og trabaho ug panginabuhian ug masulbad ang kalisod sa mga Sugboanon. MEL BANAT NEWS