Comelec nipauswag sa voter registration

CEBU, Philippines — Giuswag sa Commission on Elections (Comelec) ang voter registration lukop nasud alang sa umaabot nga Barangay ug Sangguniang Kabataan Elections (BSKE) gikan sa Hulyo ngadto sa ulahing bahin sa Oktubre niining tuiga.

Base sa taho sa Philippine Star, si Comelec Chairman George Garcia nagkanayon nga gikan sa orihinal nga petsa sa Hulyo 1 hangtud sa Hulyo 11, 2025 ang voter registration ipahigayon na sa kataposang semana sa Oktubre human sa Bangsamoro parliamentary election ug molungtad hangtud sa Hulyo 2026.

Matud ni Garcia nga ang gi-reschedule nga voter registration magsilbing preparasyon sa BSKE sa Nobiyembre 2026 kong ugaling mahimo na nga balaod ang bill o balaodnon nga nagsugyot sa pagpalugway sa termino sa barangay officials.

Bisan og gisuspenso ang voter registration ang Comelec magpadayon gihapon sa ubang pagpangandam sa BSKE tungod kay ang gisugyot nga lakang wala pa mapirmahi ni Presidente Ferdinand "Bongbong" Marcos, Jr.

Apan bisan kon mahimong balaod ang maong bill matud ni Garcia nga ang legalidad sa paglugway sa mga termino sa barangay ug SK officials mahimo gihapong kwestiyonon ngadto sa Korte Suprema. Gikataho nga kaniadto ang Korte Suprema niluwat og temporary restraining order (TRO) nga nagsuspenso sa pagpatuman sa balaod nga nag-postpone sa 2022 BSKE.

Dugang ni Garcia nga iapil sa Comelec sa procurement contracts ang probisyon nga magtugot sa pagkansela kong adunay kalit nga panghitabo nga dili malikayan. BDB BANAT NEWS