Gatusan ka Mandauehanon nagtinguha sa pagtungha sa MCC

CEBU, Philippines — Ang mga Mandauehanon nga mopasar sa entrance examination ug interview ang mahimong makatungha sa first year college diha sa Mandaue City College sa school year 2025- 2026.

Kini ang gipadayag ni outgoing councilor ug board member elect Malcolm Sanchez nga maoy chairman sa committee on education sa konseho sa siyudad.

Nakigkita kang Sanchez ang gatusan ka Mandauenon kinsa nagtinguha sa pagtungha sa MCC kinsa pipila kanila ang gikuyogan pa ilang mga ginikanan sa pagpakig-atubng kang Sanchez human sa ilang regular session kagahapon nga mao usab ang adlaw sa pagbukas sa klase.

Matud ni Sanchez nga gihimo ang pagpakigta kaniya sa maong mga ginikanan tungod kay wala malakip sa gi-post sa MCC ang pangalan sa ilang mga anak human sa entrance test ug gikatahong nagpasabot nga wala kini makapasar.

Gikataho nga tinguha sa maong mga ginikanan ang pagpangayo og endorsement letter alang ngadto sa mga nagdumala sa MCC sa pamasin  nga dawaton ang ilang mga anak nga makatungha sa MCC.

Apan giklaro ni Sanchez nga ang endorsement letter nga gipangayo sa mga ginikanan dili garantiya nga madawat na ang ilang anak sa pagtungha sa MCC tungod kay ang selection board adunay pamaagi kon si kinsa ang qualified nga makatungha sa maong tunghaan.

Gihimo  ang maong pamaagi  tungod kay limitado lang sa 500  ka tinun-an ang dawaton sa pagtungha niining pagbukas sa klase.

Gipasabot niya nga ang kakuwang sa mga lawak saringan sa MCC ug gipaigo lang usab nila ang maong gidaghanon sa ilang mga professor nga modumala niini sa pagtudlo.

Gikataho usab nga daghan sa mga kabus nga ginikanan sa Siyudad sa Mandaue ang nagtinguha nga makatungha  sa kolehiyo ang ilang mga anak tungod kay libre ang balayranan sa matrikula sa MCC. —/BDB (BANAT NEWS)