Krisis sa kuryente sa Siquijor nasulbad na
CEBU, Philippines — Krisis sa kuryente sa Siquijor nga nakaapekto sa kalamboan sa probinsya gikatahong nasulbad na human nabalik ug na-stabilize na ang suplay niini human gipangunayan sa gobiyerno ang pagpabalik niini. Kahinumdoman nga niadtong Hunyo 3, gipaubos ang probinsya sa Siquijor sa state of calamity tungod sa krisis nga mitumaw human wala nigana ang tanang unom ka diesel-powered generators nga gipadagan sa Siquijor Island Power Corporation (SIPCOR), ang bugtong supplier og kuryente sa probinsya.
Si Energy Officer-in-Charge Sharon S. Garin nipahibawo nga tungod sa paningkamot sa Department of Energy (DOE) uban ang National Electrification Administration (NEA) ug Provincial Government sa Siquijor dako nahatagan og alibyo ang isla.
Sa Hunyo 14, 2025, ang kinatibuk-ang available nga kapasidad sa probinsiya niabot na sa 10.6 megawatts (MW).
Ang 7.2 MW nagagikan sa unom ka nag-operate nga generation units sa walo ka yunit sa Siquijor Island Power Corporation (SIPCOR); 1.7 MW gikan sa generator sets nga gipadala sa Palawan Electric Cooperative, Inc. (PALECO), nga malampusong nasumpay sa grid niadtong Hunyo 14; ug 1.7 MW gikan sa duha ka giabangan nga gensets sa SIPCOR.
Samtang, padayon pa ang pagtrabaho sa duha ka nahibiling yunit sa SIPCOR — ang Unit 7 ug Unit 8 — diin gilauman nga mahuman ang Unit 8 sa Hunyo 18 ug sa Hulyo 18 alang sa Unit 7. Aron maseguro pa ang padayon nga suplay sa kuryente sa probinsiya, tutokan sa DOE ang regulatory compliance sa SIPCOR sa Energy Regulatory Commission, ang tukma sa panahon nga pag-ayo sa mga genset unit niini ug ang paghatod sa suplay sa gasolina.
Ang SIPCOR misaad nga tumanon ang minimum nga 10 ka adlaw nga fuel inventory requirement sulod sa sunod nga napulo ka adlaw aron masiguro ang padayon nga operasyon sa tanang generator sets niini.
Makigkoordinar usab ang Department of Energy (DOE) sa Province of Siquijor Electric Cooperative, Inc. (PROSIELCO) kabahin sa Certificate of Conformity nga gi-isyu sa National Electrification Administration (NEA) aron masugdan ang selection process alang sa pagpalit og 5 hangtod 11 megawatts nga baseload power supply. — /IBM (BANAT NEWS)
- Latest
