Polis nga “butalo” pailisan og sundang ang armas

CEBU, Philippines — Ang Cebu City Police Office nag-andam og programa aron mahimong hingigo ang ilang mga police personnel diin subay kini sa kamandoan ni PNP Chief General Nicolas Torre III sa pagpatuman sa firearms proficiency policy ug kon butalo ang polis ilisan og sundang ang mga armas niini.

Gikataho nga mismo si Torres andam usab mopaubos sa firearms proficiency test ug kon dili siya makapasar mo-retiro siya sa iyang pagka-polis tungod kay nagpasabot kini nga seryoso siya niini.

Ang maong kamandoan gihangop sa Cebu City Police Office.  Matud ni Police Lieutenant Colonel María Theresa Macatangay, deputy city director for operations ug tigpamaba sa CCPO nga ang mga programa nga ipatuman ni Police Colonel Enrico Figueroa mao ang eight keep bullet diin sa walo ka bala kinahanglan nga maigo nila ang ilang target sa walo ka higayon. Apil usab sa gipangandaman nila ang gun proficiency test.

Masaligon ang CCPO nga silang tanan makapasar sa standard nga gipatuman sa bag-ong Chief PNP.

Alang sa CCPO nga kinahanglan ang usa ka polis bansay sa paggamit sa iyahang armas.  Matud sa CCPO nga dakong hagit sa tanang polis sa Dakbayan sa Sugbo ang pag- practice sa paggamit sa ilang armas tungod sa ka mahal na usab presyo sa bala karon. Apan gihimug-atan niini nga dili kini babag sa ilang pagbansay tungod kay abagan usab sila sa local government unit. - /BDB (BANAT NEWS)