HRDO naghuwat sa mando ni Archival pag-renew sa mga empleyado

CEBU, Philippines — Gibutyag ni Henry Tomalabcad, pangulo sa Human Resource Development Office (HRDO) sa Dakbayan sa Sugbo nga naghuwat nalang siya ni mayor-elect Nestor Archival nga mohatag pagtugot aron sa pag-renew ug paglugway sa kontrata sa 3,000 ka casual nga empleyado sa city hall.

Sayo pa, nisaad si Archival nga wala siya’y dinalian nga usbon ubos sa iyang administrasyon lakip na nga ipaubos ngadto sa status quo ang mga empleyado sulod sa tulo ka buwan tungod kay gitimbang-timbang pa og kapaigo ba ang pundo sa panudlanan sa siyudad aron isweldo sa mga empleyado.

Apan gitan-aw ni Tomalabcad nga adunay nakagahin nga pundo alang sa sweldo sa tanang casual nga empleyado sulod sa usa ka tuig. Samtang nga nagpaabot sa mando ni Archival, matud ni Tomalabcad nga giandam na nila ang mga listahan sa mga ma-renew nga kontrata kinsa mamahimong matudlo sa bisan asa ug unsa nga posisyon madestino.

Sa pagkakaron, wala pa giapil ni Tomalabcad ang listahan alang sa job order nga mga empleyado tungod kay dili pa matino kong lakip ba kini sa ma-renew ug mag-agad lang sila sa mando gikan kang Archival. —/BDB (BANAT NEWS)