Councilor-elect Harold Go nanumpa atubangan ni Kapitan Cadungog

CEBU, Philippines — Nidaug nga konsehal, Harold Kendrick Go sa North District sa Dakbayan sa Sugbo, nipahigayon sa iyang oathtaking atubangan ni Kamputhaw Barangay Captain Jessica Cadungog.

Kini gisaksihan sa mga opisyal sa barangay ug sa mga senior citizens kagahapon sa hapon Hunyo 15, 2025.

Matud pa ni Go, gidungan ang iyang oathtaking sa general membership sa mga senior citizens sa barangay Kamputhaw.

Nasayran nihangyo ang mga tigulang nga adto siya mohurar sa ilang barangay diin siya unang nahimong konsehal ug nagsugod sa iyang unang pagserbisyo sa publiko.

Nagkanayon si Go nga tinguha niya nga i-promote mao ang livelihood project nga maghatag og panginabuhian ilabi na ang pag negosyo.

Gipasalig usab niini nga andam siya mosuporta sa bisan unsa nga programa sa bag-ong administrasyon basta kaayohan sa mga Sugbuanon.

Si Go, niawhag sa katawhan nga magtinabangay kay dili man nila makaya kun sila lang nga mga opisyal sa siyudad ug nanginahanglan sila ug tabang para sa paglambo sa dakbayan. — /MEL (BANAT NEWS)