27.6 milyong tinun-an magpanon sa mga eskuylahan karon

CEBU, Philippines — Karong adlawa gipaabot nga magpanon ang gibanabanang 27.6 milyones ka mga tinun-an alang sa opisyal nga magbukas og balik ang klase sa mga pangpublikong tunghaan sa Pilipinas para sa tuig 2025-2026.

Dinhi sa Sugbu, nangandam na ang nagkadaiyang mga ahensiya sa gobiyerno gawas sa DepEd alang sa hapsay ug luwas nga pagbalik sa mga bata sa mga tunghaan.

Ang Cebu City Transportation Office (CCTO) mopakatap katunga sa ilang pwersa diha sa mga public schools sa siyudad ilabi na kadtong mga eskuylahan nga dunay dagkong karsada nga pirmeng puno sa mga sakyanan.

Si CCTO Assistant Head Atty. Kent Jongoy sa pakighinabi sa The Freeman, igsuong pamantalaan sa Banat News mibutyag nga 50% sa ilang 564 traffic enforcers ang ibutang duol sa mga eskuylahan.

Ang Cebu City adunay 107 public schools ug mayoriya niini naa nahimutang sa siyudad kay ang uban naa sa mga barangay sa kabukiran.

Lakip sa mga eskuylahan nga bantayanan tungod sa kadaghan sa mga sakyanan mao ang Abellana National School, City Central School, Cebu Technological University, Vicente Rama Elementary and National High School, Talamban, Bo. Luz Elementary and National High School, ug mga eskuylahan sa Banilad, Labangon, Punta Princesa, ug Mambaling.

Hinuon, gibutyag ni Jongoy nga motabang kanila ang mga barangay tanod duol sa mga eskuylahan.

Sa pikas bahin, gimando ni Presidente Ferdinand R. Marcos Jr. ang mga local water authorities nga siguraduhong dunay limpyo ug luwas gamitong tubig ang mga eskuylahan human nakadawat kini og report nga dunay mga public schools nga walay agas sa tubig.

Atol sa Malacañang press briefing niadtong Biyernes, si Local Water Utilities Administration (LWUA) Administrator Jose Moises Salonga miingon nga duna nay gipagawas nga memorandum circular sa tanang 532 water districts ubos sa LWUA’s oversight bahin niini.

Sa laing bahin, gibutyag sa DepEd nga nagtinguha kining magpahimo og dugang 105,000 ka mga classrooms pinaagi sa tabang sa pribadong sektor aron matubag ang 165,000 nga kakulangon niini karong tuiga.

Ang Pilipinas adunay sobra 45,000 ka mga public schools tibuok nasud nga gibutangan karon og dul-an 900,000 ka mga magtutudlo apan kuwang pa gihapon og sobra 56,000 para niining tuiga.

Sa report sa GMA News.tv, si DepEd Secretary Sonny Angara miangkon nga sa ingon ani lang nga budget ug kalangan sa pagtukod og classrooms, maabtan og 55 ka tuig una pa kini maapas og tukod.

“Sa ganitong budget, aabutin tayo ng 55 taon bago natin matapos ang kakulangan sa mga silid-aralan,” pamahayag pang Angara Super Radyo dzBB.

Usa sa matud pa nakitang hinungdan aning kakulangon sa mga classrooms mao kining paspas nga pagsaka sa populasyon, kalamidad nga nakaguba ug nahimong dili na luwas gamiton ang mga buildings ug kining dugay ng problema nga kagamay sa pundo para sa mga pasilidad. — /IBM (BANAT NEWS)