Garcia bahin ni Rama: Wala koy sala niya

CEBU, Philippines — Bisan pa man sa mga init nga panagbangi tungod sa politika, giklaro ni Cebu City Mayor Raymond Alvin Garcia nga wala siya’y sala ni kanhi mayor Michael Rama.

Maingon nga init gyud ang duha sa ulahing piniliay tungod kay si Garcia mao ang nihulip ni Rama sa katungdanan isip mayor sa syudad human nga gipaubos si Rama og preventive suspension niadtong Mayo 2024 hangtud sa gipahamtangan kini og perpetual disqualification niadtong Oktubre 2024. Nagtuo si Garcia nga kini ang hinungdan nganong nagbikil ang KUSUG Panaghiusa ug Partido Barug – Team Rama sa nahitabong eleksyon.

Sa pagpakighinabi ngadto kang Garcia, gipadayag niya nga dako gihapon ang iyang respeto ngadto kang Rama bisan pa man sa tanang mga pagpakauwaw ug mga dili makiangayon nga mga atake sa radyo, telebisyon, social media kun diin kanunay siya nga sawayon sa iyang mga desisyon sa pagdumala sa syudad, mga palisiya nga iyang ipatuman ug tanan niyang gibuhat sa iyang administrasyon sulod sa usa ka tuig.

Gani, dili sab makalimtan ni Garcia nga gihininganlan siya ni Rama og “Fake Mayor” ug gipasakaan og patong patong nga kaso gikan sa mga kampo niini tungod kay nihurar dayon siya bisan pa man og wala pa nipagawas sa opisyal nga hukom ang buhatan sa Ombudsman Visayas kabahin sa mga kasong grave misconduct ug nepotismo.

Bisan pa man sa mga pagsaway, wala siya’y bati nga mga pulong nga gibawos ngadto kang Rama ug kun mag-abot man sila, mopakita gihapon siya og pangatahuran.

“In fact, when I see him, when I meet him, kay kaning mga tawo nga walay sala bitaw moduol, it’s really as if nothing happened kay wala man tay sala,” padayag pa ni Garcia bahin sa iyang ninong sa kasal.

Gituman lang matud ni Garcia ang iyang gipanumpaan base sa Local Government Code sa Department of the Interior and Local Government ug ang iyang paghurar legal ug makita kini sa kung kinsa ang gisunod sa mga tawo ug mga empleyado sa kagamhanan.

Kahinumduman, nag-uban si Garcia ug Rama sa usa ka partido sa pinilay niadtong 2022. Apan human sa tulo ka tuig, nag-atbangay na ang duha alang sa pagka-mayor apan pareho nga napakyas ngadto kang Konsehal Nestor Archival kinsa nagpasilong sa Bando Osmeña Pundok Kauswagan. —/IBM (BANAT NEWS)