SKF sa Mandaue nangandoy nga maka-sakyanan

CEBU, Philippines — Nagpaabot og paglaum si Mandaue City SK Federation President ug ex-officio Councilor Fleuritz Gayle Jumao-as nga ang sunod nga administrasyon mohatag og pagtagad sa panginahanglan sa ubang SK officials nga wala naapil sa distribusyon. Kini human giaprubahan sa City Council ang usa ka ordinansa nga nagtugot sa Office of the Mayor sa pagformalize sa deed of donation sa 15 ka sakyanan ngadto sa napiling mga SK chairpersons—usa ka lakang nga nakapukaw og kontrobersiya gikan sa kampo sa mosunod nga administration.

Sumala sa taho, gilantaw sa transition team ni Mayor-elect Thadeo Jovito “Jonkie” Ouano, nga gipangulohan ni Atty. Gonzalo “Sally” Malig-on, nga gidali ang maong pag-apruba sa donasyon, nga ilang gitawag og “midnight action.” Apan sa iyang depensa, giingon ni Jumao-as nga karon pa lamang kini nalihok tungod kay naapektuhan kini sa election ban.

Kataposang barangay nga nakadawat og sakyanan mao ang Barangay Paknaan, nga gialagaran usab ni Jumao-as, ug nadawat lang ang ilang unit niadtong Disyembre.

Matud niya, pag-abot sa Enero, kulang pa ang requirements ug dokumento, ug wala gyud maproseso ang deed of donation tungod sa election ban maong karon palang nila kini nabuhat.

Gihimakak niya ang mga pasangil nga politikal ang motibo sa maong lakang kay wala silay kalambigitan sa umaabot nga administrasyon o sa pagbabag sa delivery sa mga serbisyo.

Gipasabot usab ni Jumao-as nga dako og gamit ang mga sakyanan, ilabi na sa mga kalihokan sa SK nga kasagaran molungtad og usa ka bulan.

Pananglitan, ang “Panagtagbo sa Mandaue” nanginahanglan og kapin duha ka buwan nga preparasyon. Lakip pa, atol sa bag-ohay lang nahuman nga Mayor’s Cup, nga usa usab ka two-month-long activity, adunay adlaw-adlaw nga dula ug praktis. Niadtong Panagtagbo Festival sa miaging buwan, usa ra ang sakyanan sa Barangay Paknaan, hinungdan nga nagbalik-balik kini og byahe gikan sa venue pabalik sa barangay. Matod pa sa SK Federation President, ang tumong sa SK Mandaue mao ang pagpalambo sa youth engagement.

Sa laing bahin, bisan pa man giaprubahan sa kadaghanan sa konseho ang maong ordinansa, tulo ka konsehal ang misupak sa pagpasa niini, lakip na si Councilor Joel Seno, nga mikuwestyon sa timing sa donasyon.

“The timing is very suspicious. Why is it donated only now?” matod ni Seno sa laing interbyu.

Nahibulong sab si Seno nga gigamit na sa SK ang mga sakyanan bisan wala pa ang pormal nga deed of donation nga kalapasan man kini sa circular sa Department of Budget and Management (DBM).

Matud niya, ang SK dapat wala hatagi og sakyanan kay entitled na sila og transportation allowance. — /IBM (BANAT NEWS)