Pilipinas ug Japan nagpahigayon og joint maritime exercise
CEBU, Philippines — Ang mga Navy sa Armed Forces of the Philippines (AFP) ug Japan Maritime Self-Defense Force (JMSDF) nipahigayon og joint maritime exercise nga nag-focus sa anti-submarine exercise ngadto sa West Philippine Sea.
Ang duha ka nasud kinsa parehong nag-atubang sa agresyon sa China sa ilang kadagatan nitapos sa ilang ikaduhang bilateral maritime cooperative activity niadtong Hunyo 14 nga nagtimaan sa labing una nga dakong hiniusang kalihokan human sa ratipikasyon sa Reciprocal Access Agreement (RAA) tali sa Pilipinas ug Japan.
Ang Philippine Navy ni-deploy sa Barko ng Republika ng Pilipinas (BRP) Miguel Malvar, AW159 anti-submarine helicopter ug Philippine Air Force C-208 ISR aircraft, lakip usab ang search and rescue units sa exercise.
Samtang, ang Japanese Navy ni-deploy sa ilang destroyer nga JS Takanami ug usa ka SH-60K Seahawk helicopter.
Matud sa AFP nga ang exercise gidisenyo aron mapauswag ang interoperability.
Gawas sa anti-submarine exercise, nalakip usab sa joint activity ang communication checks, cross-deck exercise, division tatics, officer of the watch maneuvers, photo exercise, ug usa ka culminating final exercise.
Base sa report sa ABS-CBN News, duha sa barko sa Navy sa China ang naglandong sa maong exercise.
Ang Pilipinas ug Japan parehong nipirma sa RAA niadtong Hulyo 8, 2024, nga naglatid sa mga probisyon sa pagsulod ug pagbiya, paglihok, pag-access sa mga pasilidad, ug propesiyonal nga praktis sa visiting force ug civilian component alang sa katuyoan sa mga kooperatibang kalihokan.
Ang duha ka nasud parehong nakasinati og agresyon sa China sa ilang kadagatan diin sa Pilipinas, ang Chinese Coast Guard ug ang maritime militia kanunay’ng manghasi sa mga barko sa Pilipinas sa pipila ka mga dapit sa West Philippine Sea.
Ang Japan nag-atubang usab sa padayong presensiya sa Chinese Coast Guard sa mga teritoryo niini sa East China Sea, partikular sa Senkaku/Diaoyu Islands. Ang maong mga isla giangkon sa Japan, China ug Taiwan. — /BDB (BANAT NEWS)
- Latest
