Motor gidaro sa trak, usa patay

CEBU, Philippines —  Usa ka kinabuhi ang nakalas dihang gidaro sa trak de karga ang usa ka motorsiklo diha sa Miñoza Street, Barangay Bacayan, siyudad sa Sugbo kagahapon sa buntag, Hunyo 14, 2025.

Ang nakalas sa maong panghitabo mao ang driver sa Suzuki Raider motorcycle nga si Johnrey Apas Pasaol, 34, taga Cabangahan, Lungsod sa Consolacion.

Samtang angol ang asawa niini nga angkas sa motorsiklo nga si Rodelyn Pasaol, 34.

Gikustodiya sa Traffic Enforcement Unit Cebu City Police Office ang driver sa trak de karga nga si Mariano Sollano Reponte, 59, taga Kimba, Talisay City.

Sa imbestigasyon sa Traffic Enforcement Unit Cebu City Police Office base sa kuha sa CCTV footage sa Villa Del Rio Subdivision ang tak ug motorsiklo pareho og direksiyon nga gibiyahian.

Gikan sa Miñoza Street paingon sa Talamban ug ang motorsiklo nag-una ug nagsunod ang trak  nga gikan pa sa Pulangbato nga nagkarga og mga hollow blocks nga dad-on unta sa isla sa Olango.

Apan giingong nikalit og basiyo ang brake sa trak de karga, ibangga unta matod pa sa driver ang truck sa gutter apan nalahos ug nadaro ang motorsiklo ug napasok kini ilawom. Ang driver sa motorsiklo gidala sa North General Hospital apan gideklarar kining dead-on-arrival samtang ang asawa niini nga naangol sab gidala sa Cebu City Medical Center.

Kasong reckless imprudence resulting in homicide, physical injury ug damage to property ang ipasaka batok sa driver sa trak.