Sud-gawas sa prisuhan nakuhaan og P1 milyong nga shabu

CEBU, Philippines —  Bag-o pang nakagawas sa prisohan niadtong Pebrero nadakpan pag-usab sa mga operatiba sa City Drug Enforcement Unit Cebu City Police Office (CCPO) atol sa ilang buy-bust operation sa Sitio San Juan. Barangay Mambaling, siyudad sa Sugbo sa miaging adlaw.

Ang suspetsado mao si Gilbert Aloba Navarro alyas Amay, 30 anyos, wala'y trabaho ug nagpuyo sa Sitio Riverside, Barangay Duljo Fatima ning siyudad.

Nasakmit gikan sa suspetsado ang 150 grams nga shabu nga nagkantidad kapin sa P1 million.  Nasayran nga niadto pang Pebrero nakagawas sa prisohan ang suspekapan wala gihapon niundang sa ilegal nga kalihukan niini.

Na-monitor pagbalik sa kapulisan nga nibalik sa illegal nga kalihukan ang suspect hinungdan nga gilusad ang operasyon.  Giingong ikatulong higayon na nga nadakpan ang suspek. 

Laing nadakpan sa mga sakop sa Mambaling Police Station sa buy-bust operation sa Sitio Puntod, Barangay Mambaling si alyas Gladies, 33,residente sa Sitio Kahuyan sa maong barangay.

Nasakmit gikan niya ang singko gramos nga shabu .Samtang ang Mabolo Police Station 4 nihimo sab og buy-bust operation sa Sitio San Roque, Barangay Luz, Cebu City.

Nadakpan si alyas Jim-Jim, 37-anyos, taga Sitio San Roque, Barangay Luz, Siyudad sa Sugbo  nga nakuhaan og 4.8 gramos nga shabu.

Kasong kalapasan sa Section 5 ug 1, Article 2 sa Republic Act 9165 ang ipasaka batok sa duha ka mga dinakpan.