Shellfish advisory gipagawas sa BFAR
CEBU, Philippines — Nagpagawas ang Bureau of Fisheries and Aquatic Resources (BFAR) Regional Office VII og local shellfish advisory nga nagpahimangno batok sa pagkolekta, pagbaligya, ug pagkonsumo sa mga shellfish ug Acetes species, nga gitawag og "alamang," gikan sa Siit Bay sa Siaton, Negros Oriental.
Sumala sa BFAR-7, ang mga sample sa tubig nga nakolekta gikan sa maong baybayon niadtong Hunyo 10, 2025, nagpositibo sa Pyrodinium bahamense—usa ka makahilong microorganism nga nailhang hinungdan sa paralytic shellfish poisoning (PSP).
Ang laboratory analysis gihimo sa BFAR-7 uban sa koordinasyon sa Negros Oriental Provincial Fishery Office ug sa Provincial Agriculturist Office.
Gitambagan sa ahensya ang publiko nga temporaryo nga likayan ang pagkolekta o pagkonsumo sa bisan unsang klase sa kinhason o alamang nga gikan sa apektadong lugar.
Samtang, ang mga isda, nukos, alimango, ug hipon nagpabiling luwas nga kan-on basta ang tanang mga tinai tangtangon sa husto ug ang seafood hugasan pag-ayo pinaagi sa nag-agas nga tubig.
Ang BFAR-7 ug local government units (LGUs) mipasalig sa pagpadayon sa pagmonitor sa Siit Bay aron mapanalipdan ang panglawas sa publiko ug suportahan ang lokal nga industriya sa kinhason.
Giawhag sa ahensya ang mga residente ug stakeholders nga magtinabangay ug mosunod sa advisory samtang naghulat sa resulta sa confirmatory test. (CEBU NEWS)
- Latest
