Bag-ong klase sa PWD ID gitanyag paglikay sa peke

CEBU, Philippines —  Gitanyag karon sa Cebu City Persons with Disabilities (PWD) Program ang bag-ong klase sa PWD ID nga libre, mas lig-on, ug adunay dugang security features aron mapugngan ang paggamit sa pekeng ID.

Ang maong ID gamitan na og Polymerizing Vinyl Chloride (PVC), usa ka lig-on ug taas og kalidad nga plastik nga materyales, ug kini nakalink sa PWD database aron dali ra ma-verify ang mga rehistradong benepisyaryo.

Matod ni Precious S. Boroalba, focal person sa PWD Program, nakadawat na sila ug daghang pekeng ID, kasagaran gikan sa mga aplikante nga gustong mo-avail sa PWD purchase booklet, nga gikinahanglan sa grocery aron makadiskwento sa ilang mga palitunon.

Daghang higayon nga nakasakmit sila og peke nga ID, apan hangtod karon wala pa’y pormal nga kaso nga nasang-at. Padayon ang imbestigasyon sa PWD Council aron masuta ang tinubdan sa mga pekeng dokumento.

Giklaro ni Boroalba nga ang mga serbisyo sa ilang buhatan walay bayad. Lakip na ang pagkuha ug pag-renew sa PWD ID, pagkuha sa booklet, ug pag-avail sa financial assistance. Apan ilang nabantayan nga daghang PWD ang mo-renew lamang kon adunay distribusyon sa ayuda.

Ang mga kakulian nga giila nga kwalipikado para makakuha og PWD ID mao ang pagka-bungol o kalisod sa pagpaminaw, kakulian sa panghuna-huna, kalisod sa pagkat-on, kondisyon sa pangisip, pisikal nga kakulian sama sa kalisod sa paglihok, problema sa pagsulti, kakulian sa panan-aw, sakit nga kanser nga gilatid sa Republic Act 11215, talagsaong sakit o rare disease nga gitakda sa Republic Act 10747, ug mga psychological nga kahimtang nga nakaapekto sa pang-adlaw-adlaw nga kinabuhi.

Ang usa ka bag-ong aplikante sa PWD gikinahanglan nga mokuhag medical certificate gikan sa medical officer sa barangay health center sa barangay diin siya nagpuyo. Kinahanglan usab makakuha og sertipikasyon nga siya usa ka permanente nga residente sa barangay.

Samtang gisugdan na sa Kagamhanan sa Dakbayan sa Sugbo ang pag-apod-apod sa P45 milyones nga pondo alang sa pinansyal nga tabang sa 15,000 ka PWD pinaagi sa Department of Social Welfare and Services (DSWS).

Kadtong wala makakuha sa ilang ayuda sa nakatakdang petsa gi-schedule nga makaclaim sa City Treasurer’s Office (CTO) karong Hunyo 17 hangtod 19, alas 8 sa buntag hangtod alas 3 sa hapon. Kung dili gihapon makakuha sulod sa maong petsa, ma-forfeit na ang ayuda. Nagpahimangno usab ang syudad nga subay sa kasamtangang ordinansa, ang benepisyaryong mapakyas sa pagkuha sa iyang ayuda sulod sa duha ka sunod-sunod nga distribusyon awtomatikong tangtangon sa listahan.

Para sa mga bedridden nga PWDs, gipahigayon ang house-to-house delivery sa ilang ayuda pinaagi sa mga personnel sa barangay ug sa Kagamhanan sa Dakbayan..(BANAT NEWS)