Garcia hatagan og award isip outstanding public servant

CEBU, Philippines — Si Cebu City Mayor Raymond Garcia modawat sa Maharlika Award for Outstanding Public Servant karong Hunyo 16 diha sa Mezzo Hotel sa Barangay Kasambagan.

Gikataho nga ang Cebu City gipasidunggan isip numero uno sa local revenue collection sa tanang lokal nga kagamhanan sa Region 7.

Base sa report sa Bureau of Local Government Finance (BLGF) ang siyudad nakatigom og P5,986,955,338.90 sa locally-sourced revenue sa tuig 2024 o 25.84 porsyento nga tubo ikompara sa niaging tuig.

Ug gumikan niini, ang Cebu City ang nag-una sa tanang Local Government Units (LGU) sa Central Visayas ug ika-tulo sa tibuok nasud sa year-on-year growth.

Ang BLGF usa ka ahensiya ubos sa Department of Finance nga nagbantay sa mga palisiya sa lokal nga buhis ug panalapi.

Gikataho usab nga dili makaapil si Garcia sa awarding ceremony gumikan kay atoa pa kini sa laing nasud.

"I share this award with the employees of the Cebu City government, especially the City Treasurer’s Office and the City Assessor’s Office for the hard work and unwavering commitment", matud ni Garcia sa iyang mensahe diha sa iyang Facebook page niadtong Hunyo 11, 2025.

Nagpasalamat usab si Garcia sa BLGF alang sa ilang pag-ila sa paningkamot sa lokal nga panggamhanan.

Gilaoman niyang ipadayonon sa umaabot nga administrasyon ang mga nasugdan nga maayong buhat sa fiscal management. Shiel Mae Agrabio, CNU Intern, BDB BANAT NEWS