Bulk Water Supply project sa Moalboal giinugurahan na

CEBU, Philippines — Giinugurahan sa opisyales sa Kapitolyo ug sa lokal nga kagamhanan sa Moalboal ang sobra sa P300 milyones nga Bulk Water Supply project sa lungsod.

Ang maong proyekto nga nahimutang sa Barangay Bala gilaoman nga makahatag og limpiyo nga tubig sa liboan ka residente sa Lungsod sa Moalboal.

Ang maong pasilidad mokuha og tubig gikan sa duol nga spring ug dayon iproseso o i-purify aron makapasar sa health ug safety standards aron magamit sa mga tawo.

Adunay mga dagkong reservoir ug storage tanks nga gibutang aron makasuplay og 6,000 cubic meters sa tubig matag adlaw.

Ang maong sestema moserbisyo kini sa siyam ka barangay sa lungsod apil ang mga barangay sa Saavedra, Tubli, Basdiot, Poblacion West, Poblacion East, Tunga, Lanao, Bugho, ug Bala pinaagi sa 63-kilometro nga pipeline network

Gikataho nga operational na kini karon diin sobra 8,000 ka panimalay ang makapahimulos sa maong tubig.“The water system not only addresses longstanding issues of water scarcity in Moalboal but also supports the municipality’s growing tourism industry”, matud sa Kapitolyo.

Ang maong proyekto kabahin sa P3 bilyones nga Water System Development Program sa Kapitolyo nga ang tinguha mao ang paghatag og reliable water access sa 25 ka local government units sa Probinsiya sa Sugbo. BDB BANAT NEWS