Lapu-Lapu hugot nga nagbantay sa scam hubs

CEBU, Philippines — Nagpadayon karon ang hugot nga pagbantay sa mga gikatahapang scam hubs nga posibleng nagtago-tago sa ilang operasyon diha sa sulod sa mga pribadong subdivisions sa Siyudad sa Lapu-Lapu

Si outgoing-mayor ug congressman-elect Junard “Ahong” Chan nagkanayon nga ang ilang gihimo kabahin kini sa ilang paghingusog sa pagsumpo sa cybercrime activities nga gikatahapang naglihok sa nahisgotang mga lugar sa siyudad.

Matud ni Chan nga ang mga tinugyanan sa balaod padayon karon sa ilang gihimong pagpaniid diha sa uban pa nga mga private subdivision nga adunay mga pasiunang mga taho kalabot sa scam hubs nga kalihokan

Gipadayag ni Chan ngadto sa mga tigbalita human usab nakompirmar sa Lapu-Lapu City Police Office  (LCPO) ug  National Bureau of Investigation (NBI)-7 ang malampuson nilang operasyon sa ilang pagronda niadtong Hunyo 4, 2025 sa usa ka  subdivision sa Barangay Mactan diin nagbase  ang scam hub activities.

Kini maoy nahimong resulta sa taud-taod nilang pagpaniid sa maong lugar diin 31 ka  tawo ang nasikop nga naglakip sa duha ka Taiwanese national nga giingong maoy nagdumala niini nga gialegar nga nalambigit sa large-scale online scamming activities. 

Si  Chan nagkanayon nga nahimong malampuson ang maong operasyon human sa taud-taod nga gihimong pagpaniid sa ilegal niining kalihokan  sa maong lugar ug  gipaubos na karon sa imbestigasyon ang tag-iya sa panimalay sa posibleng  kalambigitan niini.

Giklaro ni Chan nga ang kagamhanan sa Siyudad sa Lapu-Lapu adunay task force nga giumol ubos sa  Executive Order 2024-40 ubos sa koordinasyon sa  Bureau of Immigration alang sa dinaliang aksiyon nga himuon batok sa nalambigit nga langyaw.  Giangkon ni Chan nga lisod ang pagsulod sa usa ka subdivisions kon walay search warrant gawas lang sa  business establishments nga mahimong susihon sa  Bureau of Fire and Protection o  sa mga otoridad nga gitugotan sa pagsusi sa matang  sa  ilang negosyo. BDB BANAT NEWS