DA nilibkas na sa pag-ban sa poultry products sa Belgium ug Germany
CEBU, Philippines — Gilibkas na sa Department of Agriculture (DA) ang temporary import ban sa poultry products sa Belgium ug animal-derived commodity sa Germany human gideklara sa duha ka nasud nga kontrolado na ang mga domestic nga sakit didto nga nakaapekto sa nahisgutang mga produkto.
Giimplementar ang pagdili sa pag-import sa domestic ug wild birds lakip na ang mga poultry product gikan sa Belgium tungod sa outbreak sa highly pathogenic avian influenza (H5N1) sa Sint-Niklaas, Oost-Vlaanderen niadtong Pebrero 17, 2025. Matud sa DA nga ang pag-ban usa ka precautionary measure nga gitumong sa pagpanalipod sa lokal nga poultry industries gikan sa potensiyal nga viral transmission.
Si Agriculture Secretary Francisco Tiu Laurel, Jr. pinaagi sa memorandum order No. 30 nagkanayon nga gilibkas na ang import ban human pormal nga gideklara sa mga Belgian veterinary authority nga nasulbad na ang outbreak diin walay bag-ong kaso sa bird flu nga gitaho pagkahuman sa Pebrero 28, 2025.
Nunot niini, gilibkas usab sa DA ang import ban sa mga animal-derived commodities gikan sa Germany pagkahuman sa deklarasyon sa European nation nga nasumpo na ang foot-and-mouth disease (FMD), usa ka makatakod nga viral infection nga nakaapekto sa mga cloven-hoofed livestock.
Ang maong pag-ban giimplementar sa DA niadtong Pebrero human gikataho sa nasud ang kompirmadong mga kaso sa FMD sa mga domestic buffaloes sa Hoppegarten nga nahimutang sa distrito sa Märkisch-Oderland, Brandenburg.
Ang FMD kasagarang makaapekto sa baka apan mahimo usab kini makatakod sa baboy, kanding, karnero, ug ubang mga cloven-hoofed animals.
Bisan og talagsa ra kini makatakod sa tawo, ang maong sakit adunay taas nga mortality rate ilabi na sa mga batang livestock ug nagdala og dakong hulga sa ekonomiya sa sektor sa agrikultura.
Matud ni Laurel nga pinaagi sa memorandum order No. 29 ang Germany giisip na karon nga FMD-free ubos sa mga giya sa World Organization for Animal Health (WOAH) Terrestrial Animal Health Code. BDB BANAT NEWS
- Latest
