Kongresista Gullas nakigtabo sa kadagkoan sa CSMC

CEBU, Philippines — Gipakigtagboan ni Kongresista Rhea Gullas sa unang distrito sa Probinsiya sa Sugbo ang kadagkoan sa Cebu South Medical Center (CSMC) aron mahibaw-an ang ilang lakang kabahin sa reklamo sa pag-atiman sa ilang mga pasyente. Giubanan si Kongresista Gullas sa iyang bana nga si Talisay City Mayor Gerald Anthony “Samsam” Gullas, Jr..

Ang CSMC nahimutang kini sa Barangay San Isidro, Dakbayan sa Talisay.

Sayo pa, nag-viral diha sa social media ang hulagway sa giingong mga paseyente nga anaa lang sa gawas ug naghigda sa sawog.

Nakita usab sa netizen nga adunay tag-as nga bangko sa kilid apan wala kini gipagamit gumikan kay gigaid kini og kadena.

Base sa Facebook post ni Kongresista Gullas nagkanayon kini nga nagsugod na sa pag-imbestiga ang CSMC sa reklamo ug nipasalig ang tagdumala sa tambalanan nga ang imbistigasyon patas ug transparent.

Ilang giklaro nga manubag ang angay nga manubag aron sab ipahibawo sa publiko.

Sa pagkakaron, padayon ang pagtrabaho sa dugang pasilidad sa tambalanan aron mas daghan pa unya sila og mga pasyente nga maatiman.

Nangayo og pasaylo ang kadagkoan sa tambalanan sa kahasol gumikan sa padayon nga trabaho ug sila nipasalig nga temporaryo lang kini.

Samtang si Kongresista Gullas nipadayag nga gawas sa Aksyon Agad Desk sa Siyudad sa Talisay ug Malasakit Center nagtinguha siya nga magbutangan og iyaha usab nga help desk ang maong tambalanan.

Matud pa ni Kongresista Gullas nga makahatag ang iyang opisina og dugang nga medical ug financial assistance sa mga nagkinahanglan nga konstituwenti.

Ug sa maong paagi dili na mobiyahe pa ang pasyente o ang ilang tigbantay ngadto sa iyang opisina aron mokuha lang og ayuda. BDB BANAT NEWS