Nangawat og aircon sa punerarya nadakpan

CEBU, Philippines — Gibalhog sa prisuhan ang usa 36-anyos nga lalake human nasakpan nga nangawat matod pa og aircon sa usa ka punerarya sa Natalio Bacalso Avenue, Barangay Mambaling, siyudad sa Sugbo niadtong Huwebes sa hapon, Hunyo 12, 2025.

Ang suspetsado mao si Jhon Mark Palermo Adante, 36, taga N. Bacalso Avenue, Barangay Mambaling ning siyudad.

Samtang ang reklamante mao si Stoney Jey Palomar, 35 anyos, manager sa St. Bernard Funeral Homes ug residente sab sa maong lugar.

Gidakop sa reklamante ang suspect ug gitugyan sa Mambaling Police Station 11 Cebu City Police Office kay nasakpan nga nanguha matod pa og 1 horse power window type air-condition nga nagkantidad og P7,000 ug usa ka 1.5 horse power window type air-condition nga nibalor og P15,000.

Padayon ang imbestigasyon sa kapulisan kun unsaon sa maong suspek ang mga aircon nga gikuha.  Kasong pagpangawat ang atubangon niini nga kaso sa suspetsado. IBM BANAT NEWS