Rama nanguha na sa mga butang sa iyang opisina   

CEBU, Philippines — Sa unang higayon, nakasulod na pagbalik si kanhi Cebu City mayor Michael Rama sa Office of the Mayor sa City Hall human sa usa ka tuig nga kini gisuspenso.

Nibisita si Rama sa City Hall tungod kay nihimo kini og courtesy call kang acting mayor Donaldo Hontiveros kagahapon, Hunyo 11, 2025.

Gipadayag ni Rama nga dili niya malikayan nga ma-emosyonal nga nakasulod pagbalik sa iyang buhatan human nga gipadlakan kini niadtong Nobiyembre 2024 tungod sa nahitabong komosyon nga gidakop si kanhi City Administrator Collin Rosell sulod sa maong lawak.

Nakuha na ni Rama kasagaran niyang mga butang sama sa paintings, plaques ug trophies ug mga personal nga mga gamit.

Suma pa ni Rama nga anaa niya gipahiluna ang mga butang sa Rama Compound sa Barangay Basak San Nicolas.

Kuhaon nalang ni Rama ang mga nahabiling kabtangan niya sama sa duha ka mga lamesa ug mga sofa.

Matud pa sa iyang kapikas nga si Malou Rama nga usa sa mga lamesa ibalhin kini sa buhatan ni Atty. Mikel Rama kinsa molingkod isip konsehal sa siyudad sugod karong Hulyo 1, 2025.

Samtang naglaum si Rama nga makabalik pa siya og paglansar kauban ang Partido Barug- Team Rama sa piniliay karong tuig 2028.

Una na nga nipadayag si Rama nga subli siya nga molansar kung mahimo na nga hybrid ang eleksyon diin adunay automation, transmission ug manual counting sa mga boto.

Wala sab gibutyag ni Rama kung unsa ang posisyon nga iyang daganan sa sunod nga eleksyon apan nipadayag siya nga kung modagan pagka-presidente sa nasud si Bise Presidente Sara Duterte, andam siya nga mosuporta isip lokal nga pangu sa Team Rama sa Sugbo. (BANAT NEWS)