Menor nanguha og mga ekipo na-rescue sa kapolisan

CEBU, Philippines — Usa ka 16-anyos nga bayong-bayong ang na-rescue sa mga tanod sa Barangay Basak San Nicolas, Siyudad sa Sugbo kagahapon sa kadlawon.

Ang maong menor gikatahong nasakpan nga nangawat og construction tools diha sa Rizal Avenue, Barangay Basak niining siyudad.

Gikataho usab nga ang suspetsado usa ka Children In Conflict with the Law (CILC), taga Sitio Alumnos, Barangay Basak San Nicolas ug usa kini ka ex-convict. Samtang ang biktima giila nga si Florien Villarta, 41, residente usab sa maong lugar.

Giingong gikuha sa maong menor ang jack hammer, bluetooth speaker, power mixer, grinder, welding machine ug router grinder nga nagkantidad og P45,000.

Ang maong mga ekipo na-recover kini diha sa junkshop tungod kay gibaligya sa menor. Sa laing bahin, nadakpan sa hot pursuit operation sa Dalaguete Municipal Police Station ang giingong notadong kawatan og motorsiklo human nga nangawat na usab kini og motorsiklo nga giparada diha sa Dalaguete Municipal Police Station niadtong Martes sa gabii.

Ang suspetsado mao si Jovan Perez Marcellana, 20, walay trabaho, taga Barangay Balud, Lungsod sa Dalaguete.

Samtang ang biktima mao si Shan Reed Cena, 21, bagger sa usa ka iladong tindahan, taga Barangay Banhigan sa maong Lungsod.

Gikataho nga ang biktima gikan sa trabaho padong na unta mouli apan nadiskubrehan niini nga gikawat na ang iyahang motorsiklo ug nagpakitabang kini sa kapolisan sa lungsod.

Gi-post usab sa biktima ang nahitabo diha sa social media alang sa public awareness. Usa ka concerned citizen ang nagpahibalo sa Dalaguete Police Station nga ang motorsiklo nakit-an sa Lungsod sa Alcoy.

Ang kapolisan sa Lungsod sa Dalaguete nihimo dayon og hot pursuit operation kuyog ang biktima.

Nadakpan sa kapolisan ang suspetsado ug na-recover ang motorsiklo nga Suzuki Raider color black.

Gikataho nga naka-recover usab ang kapolisan sa Dalaguete og laing motorsiklo nga giingong gikawat gihapon sa suspetsado. (BANAT NEWS)