Mason patay human matagaki og tubo sa tangkugo

CEBU, Philippines — Gipahunong sa Office of the Building Official ang pagtrabaho sa duha sa lima ka  condominium project diha sa Barangay Zapatera, Dakbayan sa Sugbo gumikan sa kamatayon sa usa ka 26-anyos nga mason human natagaki og G.I. pipe ang tangkugo niini.

Ang biktima giila nga si Julito Bacus Gerada, Jr., residente sa Barangay Biga, Dakbayan sa Toledo.

Si Architect Florante Catalan, pangulo sa OBO nagkanayon nga naggikan ang tubo sa ika-22 nga andana ug nahulog kini ngadto sa nahimutangan ni Gerada sa ika-walo nga andana diin niadtong higayona nag-plaster sa bong-bong ang bitkima.

Base sa imbestigasyon ni Catalan, ang safety officer nangangkon nga nagsul-ob og hard hat si Gerada sa pagpahigayon niini sa iyang trabaho.

Gikathao nga parte ang tubo sa mga safety measures matag andana nga maoy gibutang nga temporaryo nga suporta sa dili pa ibutang ang railings.

Gituohan nga posibleng natagak ang tubo tungod sa dili hustong pagtang-tang sa matag andana.

Niadtong higayona gikuha usab ang mga safety net tungod kay gipang-plaster ang bong-bong ug dili kini mahimo kon adunay mga safety net.

Gikataho usab nga ang ubang mga trabahante nibutyag nga pasado alas 5:30 sa hapon sa Hunyo 10, 2025, kalit lang nga adunay tubo nga natagak.

Kasamtangang gipahunong ang pagtrabaho sa Tower B ug D samtang gitugotan nga ipadayon ang pagtrabaho sa Tower A, C, ug E apan ang mechanical nga operasyon magpabiling suspendido hangtud ma-update ug masumite ang mga gikinahanglang permit ngadto sa OBO sulod sa lima ka adlaw aron malibkas ang suspension order. — Decemay P. Padilla, Rowena D. Capistrano (BANAT NEWS)