Archival nangita’g topnotchers

CEBU, Philippines — Nangita og mga lantip ug mga madasigong mga batan-ong propesyonal si Cebu City mayor-elect Nestor Archival aron maoy motabang sa paghatag og mga solusyon sa mga problemang giatubang sa siyudad ug motabang aron mapalambo ang mga serbisyo sa kagamhanan sa Dakbayan sa Sugbo.

Matud pa sa post ni Archival nga nangita siya og mga motabang sa pag “re-engineer” sa kagamhanan ubos sa iyang termino nga magsugod karong Hulyo 1, 2025.

Ang mga gipangita ni Archival mao kadtong mga bag-ong gradwadyo sa kolehiyo sulod sa miaging tulo ka tuig nga adunay Latin Honors o usa ka board topnotchers, susama kini niadtong Mayor’s Management Team ni kanhi mayor ug karon Vice Mayor-elect Tomas Osmeña nga gilangkuban og mga banggiitang mga graduates sa kolehiyo.

Gusto ni Archival nga makakita og mga bag-ong ideya gikan sa kasamtangang henerasyon sa mga kabantan-unan.

Hinuon dili basta-basta ang maapil sa maong grupo kay lisod ang tahas ug mas taas nga oras sa trabaho kun itandi ubang mga empleyado sa kagamhanan.

Gipasalig ni Archival nga palahi ug dili matupngang kasinatian kabahin sa pagdumala, pagpangulo ug serbisyo publiko ang makat-onan aning maong grupo. IBM  BANAT NEWS