Drug den gironda
CEBU, Philippines — Gironda sa mga operatiba sa PDEA-7 ug Cebu City Police Station 6 ang usa ka drug den ug nadakpan nila ang lima ka indibidwal diha sa Magsaysay Street, Barangay Pasil, Siyudad sa Sugbo niadtong Lunes sa hapon, Hunyo 9, 2025.
Nadakpan sa mga operatiba ang subject sa operasyon ug drug den maintainer nga si alyas Elcid, 45. Laing nadakpan ang upat ka bisita niini nga sila si alyas Amado, 50; alyas Junrey, 40; ug magsuong alyas Evelyn, 42, ug si alyas Erwin, 45, bookkeeper nga taga Barangay Cambaro, Mandaue City.
Nasakmit sa mga operatiba ang 17 ka putos sa gituohang shabu nga nagkantidad og P108,800, usa ka open plastic sachet nga dunay traces sa gituohang shabu, upat ka foil strips bga dunay traces sa gituohang shabu ug uban pang drug paraphernalia.
Gironda ang lugar human dunay mga concerned citizens nga nisumbong ngadto sa mga otoridad.
Sa laing bahin, sugod Enero 12 hantod sa Hunyo 8, 2025 ang Cebu Police Provincial Office(CPPO) nakapahigayon og 850 ka police operations batok sa illegal nga drugas nga niresulta pagkasakmit sa sobra pito ka kilong shabu nga nagkantidad og dul-an P50 milyones, kapin tulo ka kilong dried marijuana leaves ug 700 stalks nga ang tanan nibalor og P176,720.
Moabot og 1,962 drug-related cases ang napasaka sa korte pinaagi sa due process.
Samtang nadakpan sab kapulisan sa Mabolo Police Station 4 Cebu City Police Office ang 18-anyos nga lalaki nga giingong nahupot ug namaligya og illegal nga drugas sa buy-bust operation niadtong Lunes sa gabii, Hunyo 9, 2025.
Ang nadakpan nga mao si alyas “Yan”, taga Sitio Ampalaya, Barangay Cambaro Siyudad sa Mandaue nga usa street level individual.
Nakuhaan ang dinakpan og 4.3 nga gramos sa gituohang shabu nga nagkantidad og P29,240.
Samtang sa Lapu-Lapu City , 905 ka tawo ang nasikop sa usa ka semanang Simultaneous Anti Criminality Law Enforcement Operation (SACLEO) sugod Hunyo 2 hangtod sa Hunyo 8, 2025.
Si Police Lieutenant Christian Torres, tigpamaba sa LCPO miingon nga lakip sa ilang mga nadakpan ang napulo ka mga Street Level Individual nga mga pusher ug nga ilang nakuhaan og 23.09 gramo nga shabu nga nagkantidad og P156, 468.00. Romeo T. Limpangog ug Anthony Despi/CNU Intern/IBM BANAT NEWS
- Latest
