Duha ka bagyo gipaabot karong Hunyo
CEBU, Philippines — Dili mominos sa duha ka bagyo pa ang gipaabot nga mosulod sa Philippine Area of Responsibility kun PAR karon buwan sa Hunyo sumala pa sa Philippine Atmospheric, Geophysical, and Astronomical Services Administration (PAGASA).
Kini ang gibutyag ni Engr. Jhomer Eclarino, ang weather specialist sa PAGASA. Matud pa niya kining nasinati nga mga pag-ulan dala kini sa Tropical Depression inubanan sa Southwest Monsoon (habagat) gawas sa PAR.
Hinuon karong Huwebes makasinati og maanindot nga dagan sa panahon hangtud na sa pagbukas sa klase.
Apan giawhag ni Eclarino ang katawhan nga dili mokompyansa ug padayon lang gihapon ang pagmonitor sa lakaw sa panahon ilabi na hapit na ang ting-ulan-ulan.
Sa pikas bahin, naghimo na og mga preparasyon ang Provincial Disaster Risk Reduction and Management Office (PDRRMO) bahin sa ting-ulan ug posibleng pagsulod sa mga bagyo.
Ang tigpamaba sa PDRRMO nga si Wilson Ramos, kauban si Neil Angelo Sanchez miingon nga gisunod sa tanang ahensiya sa gobiyerno ang mga advisories sa PAGASA aron tukma ang pagresponde.
Ang mga tagdumala sa mga eskuylahan ug mga mayor sa kalungsoran mahimong maoy mopasuspenso sa klase kun dautan ang panahon.
Duna na say ekipo ang PDRRMO nga pang komunikasyon bisan og mag total blackout tungod sa bagyo aron maka-contact gihapon sa mga LGUs, apan giangkon niini nga kuwang pa ang mga evacuation centers sa LGUs.
Sa pagkakaron, nangindahay ang PDRRMO nga makabaton og bag-ong mga search and rescue equipment. Clifford Bacon/CNU Intern/IBM BANAT NEWS
- Latest
