Comelec nituman sa direktiba sa pagpahigayon sa BSKE

CEBU, Philippines — Gikompirma sa Commission on Elections -7 nga ang Barangay ug Sangguniang Kabataan Elections (BSKE) nga gikatakda sa Disyembre 1, 2025 magpadayon subay sa plano bisan sa nagpadayon nga mga debate sa Kongreso ug Senado sa gisugyot nga mga lakang sa paglugway sa termino sa mga opisyal sa barangay ug SK.

Kini ang giklaro ni Comelec-7 Director Francisco Pobe kagahapon subay sa opisyal nga direktiba gikan sa Comelec national office.

Gipasabot niya nga samtang nagdebate pa ang mga magbabalaod sa mga sugyot sa pagpalugway sa termino, ang Comelec obligado sa mga kasamtangang balaod aron ipatuman ang election process subay sa schedule.

Gikataho nga sa kasamtangan adunay duha ka nagkasumpaki nga balaodnon sa Kongreso.

Sa Senado, ang lakang nga gipanginahanan ni Senador Imee Marcos napasar sa ikatulong pagbasa ug nagpaabot sa pirma sa presidente diin nagsugyot kini nga ang opisyales sa barangay magsilbi og four-year term hangtud sa tulo ka termino.              

Nunot niini, gikataho nga bag-o lang giaprobahan sa Kongreso ang balaodnon nga nagsugyot og unom ka tuig nga termino nga adunay usa ka posibleng re-election alang sa opisyales sa barangay ug single-term setup alang sa SK officials.

Matud ni Pobe nga nagpadayon na ang pagpangandam sa eleksiyon diin ang registration magsugod karong Hulyo 1.

Ang Comelec-7 nipasalig sa publiko nga andam silang mohimo sa proseso sa eleksiyon gawas lang kon adunay bag-ong balaod nga magmando. BDB BANAT NEWS