Mga depektoso na nga bandera gipangsunog kagahapon

CEBU, Philippines — Unom ka bandera ang gisunog atol sa gipahigayong Solemn Flag Disposal Ceremony kagahapon sa hapon diha sa Cebu City National Science High School sa Barangay Labangon.

Ang maong kalihokan subay kini sa Section 14 sa Akta Republika  No.8491 kun “An Act Prescribing the Code of the National Flag, Anthem, Motto, Coat-of-Arms and other Heraldic Items and Devices of the Philippines”,

Ubos sa maong balaod dili basta-basta ilabay ang mga daan o guba na nga bandera diin ang disposal niini ipaagi sa seremoniyas alang sa pagsunog sa maong bander aron malikayan ang sayop nga paggamit o pagpasipala niini.

Kinahanglan usab nga ilisan ang bandera sa higayon nga aduna kini kadaot ug daan na kaayo.

Ang Solemn Flag Disposal Ceremony usa ka kini ka pormal ug adunay dignidad nga okasyon alang sa pagpasidungog sa atong nasudnong simbolo pinaagi sa husto ug matinahuron nga paglabay.

Gipangulohan ang maong seremoniyas ni Bise Mayor Donaldo “Dondon” Hontiveros ug sa Cultural and Historical Affairs Commission kauban ang Boy Scouts of the Philippines-Cebu City National Science High School pinangulohan ni Scout Master Rudolph Paqueo. Shiela Mae Agrabio, CNU Intern/BDB BANAT NEWS