Daghan sa mga kandidato wa pa kasumitir sa ilang SOCE

CEBU, Philippines — Ang Commission on Elections (COMELEC) Region 7 mitaho nga sa 2,385 ka mga kandidato sa Central Visayas, 839 pa ang nakasumite sa ilang Statements of Contributions and Expenditures (SOCE) subay sa 2025 National and Local Elections.

Sa 839 nga misumiter, 444 ang gikan sa Sugbo ug 395 gikan sa Bohol.

Si Regional Director Atty. Si Francisco Pobe nagkanayon nga hangtod Martes, Hunyo 10, aduna pay 1,546 ka mga kandidato sa rehiyon ang wala pa makatuman sa mandatory post-election requirement.

Giklaro ni Pobe nga ang tanang mga kandidato - midaog man o napildi - gi-require sa balaod nga mosumite sa ilang mga SOCE ug ang mapakyas pagtuman niini mag-atubang og kaso.

Dugang pa niya alang sa mga napildi, ang kapakyas sa pag-file posibleng mosangpot sa pag-atubang og criminal case nga dili moubos sa 6 ka tuig nga pagkapriso nga walay pribilihiyo sa mga probisyon o ma-disqualify sa pagdagan sa sunod piniliay.

Ang midaog nga mga kandidato mahimong did-an sa Department of the Interior and Local Government (DILG) sa pag-asumir sa katungdanan.

Karong adlawa, Hunyo 11 ang deadline sa pag-file sa SOCE.

Matud sa COMELEC-7, kadtong mga kandidato nga napakyas sa pagsumitir kinahanglan nga mosumiter sa ilang mga SOCE direkta ngadto sa main office sa Manila, tungod kay dili na dawaton ang late filings sa regional level.

Samtang nakaduso na si mayor-elect Nestor Archival sa iyang Statement of Contributions and Expenditures kagahapon, Hunyo 10, 2025, usa ka adlaw sa dili pa ang deadline.

Gitug-an ni Archival nga gibana-bana nga anaa sa P1.1 milyon ang iyang nagasto sa piniliay ug mas dako kini itandi sa mga milabay nga piniliay tungod kay gikan sa amihanang paingon sa habagatang distrito ang sakop sa iyang pangampanya karong tuiga. Rowena D. Capistrano/Preciosa Bacalso/MEL BANAT NEWS