Cebu City Child Welfare Center tukoron

CEBU, Philippines — Makatagamtam na og bag-ong panimalay ang kabataan nga naluwas sa kalsada human gi-aprobahan sa Cebu City Council ang ordinansa ni Konsehal Jocelyn Pesquera nga nagtukod og Cebu City Child Welfare Center.

Naaprubahan kini sa ikatulo ug katapusang pagbasa sa labing uwahing sesyon sa konseho.

Sumala sa ordinansa, niadtong Enero 19, 1981, giluwatan sa konseho ang Ordinance No. 1087 nga nagtukod sa Cebu City Community Scouts Commission. Kini nga buhatan maoy nagdumala sa mga programa alang sa mga out-of-school youth nga sakop sa Boy Scouts of the Philippines.

Apan sa dagan sa panahon, misangko ang serbisyo sa Community Scouts ngadto sa pag-atiman ug pagdumala sa usa ka pasilidad nga gipuy-an sa mga batan-ong lalake nga in conflict with the law.

Tungod sa kausaban, mitumaw usab ang Cebu City Community Scouts Youth Guidance Center nga walay klarong ordinansa nga nagpaluyo niini. Tungod niini, naglibog ang uban kon kini ba usa ka pribado o gobyernong pasilidad.

Giingon sa ordinansa: “The Cebu City Government is committed to eliminate the presence of street children vis-a-vis adherence to the promotion of positive discipline.”

Tungod niini, nakita nga angay na nga i-institusyonal ang pagtukod sa Child Welfare Center. Niadtong Nobiyembre 22, 2023, gi-aprobahan usab sa konseho ang City Ordinance 2726 nga nag-reorganisa sa Department of Social Welfare Services (DSWS).

Ubos sa ordinansa, giingon sa Rule VII, Section 15, Paragraph 2 nga ang DSWS maoy responsable sa pagdumala sa Child Welfare Center isip temporaryong puy-anan sa mga batang lalake nga 7 hangtud 14 anyos, nga giisip nga “in need of special protection” ug kadtong naay peligro nga mahimong street children.

Sa bag-ong plano, giila usab ang kahimtang sa mga batang babaye ug ilang kasinatian nga lahi sa mga batang lalake. Ang tumong mao ang pagtukod og patas ug inklusibong serbisyo alang sa tanan nga mga bata.

Ang ordinansa mipasalig nga mopundo alang sa mga kinahanglanon sama sa signage, stationery, imprastruktura, ug uban pang materyales aron mas mapalapdan pa ang operasyon ug serbisyo sa center. — /MEL (BANAT NEWS)