Rama gustong putlon ang “vicious cycle” sa eleksyon

CEBU, Philippines — Si kanhi Cebu City mayor Michael Rama misaad nga ipadayun niya ang pagsupak sa resulta sa bag-ohay lang nahuman nga midterm elections, plano niyang magpa manual recount ug target niya putlon na kining gihulagway niyang “vicious cycle” atol sa piniliay.

Si Rama kinsa niduso og election protest sa Commission on Elections (Comelec) sa Manila niatubang sa media sa pagabot niini kagahapon ug nibutyag sa detalye sa iyang petisyon.

Si Rama nagkanayon nga ang nahitabo karon mura og déjà vu sa 2016 elections, dihang ang automated counting machines giingong nakasinati og technical glitches.

Samtang tuod dako iyang respeto sa Comelec, malaumon siyang aksyonan iyang protesta sama sa gihimo nila niadtong 2016.

Gipaila sab sa media ni Rama si Dax Arcilla, nga usa ka information technology specialist kinsa maoy mo-examine sa teknikal nga aspeto sa electoral process.

Matud ni Rama magpadayun siya sa pagduso og electoral reforms ilabi na siya ang lider karon sa oposisyon ubos sa PDP Laban sa Regions 6, 7, ug 8.

Siya midugang nga kining iyang panawagan nga mag mag manual recount pagpadayun kini sa iyang baruganan ug adbokasiya sukad pa kaniadto batok automated vote counting.

Gani niadtong 2016 nahinumdom pa siya nga nisuporta sa iyang adbokasiya si kaniadto vice presidential candidate Ferdinand “Bongbong” Marcos Jr. nga nag-ingong nagmatngon sab kini anang mga “technology glitches.”

Nagduda si Rama sa 120,124 nga boto nga iyang nadawat sa nakalabay nga eleksyon kay pinakagamay kini niya nga nakuha kun itandi sa mga nibotar kaniya sa dihang nidagan siya niadtong tuig 2021 sa pagka mayor ug vice mayor.

“Figure will not lie, only liars cannot figure. Hence, it is imperative to file a protest for the people to know the truth. As I have already filed an election protest, all election matters are now converted into a legal matter subject to legal proceedings,” matud niya.

Si Rama mitug-an sab nga kining iyang protesta parte kini sa iyang preparasyon alang sa 2028 national and local elections.

Samtang si Cebu City mayor-elect Nestor Archival Sr. sa iyang bahin mitahod sa desisyon ni Rama pagprotesta apan nagtuo siyang ang resulta repleksyon kini sa kabubut-on sa katawhan.

“Basin ma realize na niya nga mag sugod nalang tag bag-o (administration), didto nalang sad ta sunod nga election mag sabot kung angay ba nga mubalik og pag dagan,” matud pang Archival. (BANAT NEWS)