Archival mohangyo sa pagpadali og human sa MCE

CEBU, Philippines — Mohangyo si Cebu City mayor-elect Nestor Archival ngadto kang Cebu governor-elect Pamela Baricuatro nga ipadali ang pagpahuman sa Metro Cebu Expressway.

Gibutyag ni Archival nga gikaestorya niya ang umaabot nga gobernadora kong mamahimo ba nga mag-join forces silang duha sa paghuman sa taud-taod na nga napadaplin nga proyekto.

Matud ni Archival nga ipundok nila ang ilang mga enhinyero ug lakip na ang Department of Public Works and Highways aron mapangitaan og paagi nga masulbad na ang nakagrabe nga problema sa dagan sa trapiko sa Sugbo lakip na ang Dakbayan sa Sugbo.

Ang 73.7 kilometro nga Metro Cebu Expressway magsilbi nga diversion road gikan sa Dakbayan sa Naga sa habagatang bahin sa Sugbo paingon na sa Dakbayan sa Danao sa amihanang bahin sa Sugbo.

Ug kong mahuman kini gilaoman nga makahatag kini og kasulbaran sa kahuot sa trapiko sulod sa Metro Cebu ilabi na sa Central Business Districts sama sa Lungsod sa Minglanilla, Dakbayan sa Talisay, Dakbayan sa Mandaue, mga lungsod sa Consolacion, Liloan, Compostela ug Dakbayan sa Danao.

Gikataho nga gipahunong ni outgoing-governor Gwendolyn Garcia ang MCE niadtong tuig 2024 aron masusi ang pagsunod environmental ug safety compliance niini.

Gawas sa pagpahuman sa MCE, makig-alayon usab si Archival ngadto kang Baricuatro sa pagsulbad sa problema sa Metropolitan Cebu Water District, paghuman sa Cebu City Medical Center ug Cebu Bus Rapid Transit ug ang mga luna sa 93-1. Gipasalig ni Archival nga ubos sa iyang termino mahiu sa pagbalik ang siyudad ngadto sa Probinsiya sa Sugbo. (BANAT NEWS)