Importer og rhd vehicles gisuspenso

CEBU, Philippines — Niluwat ang Land Transportation Office (LTO) og show cause order (SCO) batok sa tag-iya sa Cebu-based company tungod sa pasangil nga kalambigitan niini sa pag-import ug pagbaligya og mga right-hand drive vehicles.

Matud ni LTO Assistant Secretary Atty. Vigor D. Mendoza II, gisuspenso usab nila og 90 ka adlaw ang akreditasyon sa maong kompanya isip kabahin sa imbestigasyon sa mga nakumpiskar nga sakyanan atol sa raid sa Quezon City niadtong miaging semana.

“We already issued an order for the preventive suspension for 90 days of the accreditation of this company amid the ongoing investigation. We want to ferret out the truth regarding this disregard of the law and part of this is to hear from them in the interest of due process,” matud ni Asec Mendoza.

Matud sa LTO nagsugod ang imbestigasyon dihang gironda sa LTO Intelligence and Investigation Division, inabagan sa Quezon City Police District (QCPD), ang bodega sa sakyanan nga nag-advertise sa social media og mga imported vehicles.

Atol sa inspeksyon, nakit-an ang daghang second-hand, right-hand drive motor vehicles ug mga dokumento sa LTO, lakip na ang certificates of registration.

Gikumpiska kini uban sa duha ka right-hand drive trucks alang sa dugang imbestigasyon.

Ang mga dokumento maoy nakaaghat kang Mendoza sa pagmando og makuting imbestigasyon ug matud pa niguwa ang pangalan sa mang Cebu-based importer.

Nasuta usab sa imbestigasyon nga ang kompanya nga nakabase sa Cebu ang giingong nagproseso sa sales reporting ug initial registration sa upat ka right-hand drive vehicles sa Mindanao.

Pinaagi sa SCO nga gipirmahan ni Executive Director Atty. Greg Pua Jr., gimandoan ang kompanya paghatag og katin-awan sa mga alegasyon ug kung nganong dili sila angayang silotan.

Kung mapakyas sila sa paghatag og tubag sulod sa lima ka adlaw posibleng mosangpot sa suspensyon o pagkansela sa akreditasyon ug multa subay sa LTO Administrative Orders.

Si Mendoza miingon nga ilegal ang mga right-hand drive vehicles sa nasud, kay sa sinugdanan pa lang, wala gyud gitugot ang pag-import niini subay sa Republic Act 8506, o An Act Banning the Registration and Operation of Vehicles With Right-Hand Steering Wheel in any Private or Public Street, Road or Highway.

Sa pagkakaron, padayon ang imbestigasyon sa ahensya aron masuta kon aduna bay personnel sa LTO nga nalambigit sa pagparehistro sa mga sakyanang ilegal.

Wala pay giluwatang pamahayag ang kampo sa maog importer. (BANAT NEWS)