Duha patay sa aksidente sa Panglao Bohol  

CEBU, Philippines — Duha patay sa nahitabong panagbangga sa motorsiklo ug sakyanan sa Purok 4, Barangay Tangnan, Panglao, Probinsya sa Bohol sa miaging adlaw.

Ang mga nakalas mao sila si Daniel Estoquia, minyo, 58 anyos, nagpuyo sa Barangay Poblacion, Panglao, Bohol ug si Ramon Cimafranca VIII, 30 anyos, minyo, residente sa Barangay Tangnan, Panglao, Bohol.

Si Estoquia maoy nagmaneho sa Yamaha Mio nga motorsiklo color gray samtang si Cimafranca driver sa Toyota Vios color black.

Sa imbestigasyon sa Panglao Police Station ang motorsiklo ug sakyanan pareho og direksiyon nga gidaganan. Gauna matod pa ang motorsiklo ug nagsunod ang sakyanan.

Apan kalit lang nabanggaan sa sakyanan ang motorsiklo diin ang driver natagak samtang naguyod sa sakyanan ang motorsiklo hantod nga nabangga kini sa punoan sa lubi.

Tungod sa kakusog sa impact patay diha-diha dayon si Cimafranca samtang si Estoquia gidala pa sa Governor Celestino Gallares Memorial Medical Center apan nakabsan gyud sa kinabuhi.

Samtang duha ka disgrasya sa Dakbayan sa Talisay ang nakuha sa CCTV niadtong miaging adlaw.

Kini nahitabo sa may Cebu South Coastal Road sa Talisay City diin mga minor lang apan dili angay kompyansahan sumala pa ni City of Talisay Traffic Operations Development Authority Chief Jonathan "Joy" Tumulak.

Ang unang disgrasya nahitabo sa may Intersection sa CSR ug kalmar street diin makita ang sakyanan nga naghunong kay stop signal ug ang ikaduhang sakyanan nga naa sa tunga ang kalit niabri sa pultahan ug tayming sa pag-agi sa nisuot nga motorista maoy hinungdan sa pagkalukapa niini.

Ikaduhang aksidente mao ang pagkatumba sa usa ka siklesta human masaghiri sa paliko unta nga suv diin matud pa wala mabantayi o anaa sa blindspot ang nagbisiklita.

Dugang pa ni Tumulak, sila sa CTTODA mohingusog sa paggukod sa mga traffic violator bisan og minor ra ang ilang kalapasan, ilabi na kay nagtimaan karon sa Road Safety Month. (BANAT NEWS)